KUTANDA KUŴECHETANA NI MUNDU
LIJIGANYO 2
Akamkanganichisyaga Kuti Amlalichile
Lilemba: “Maloŵe gambone gakuŵechetedwa pa ndaŵi jambone gakusasangalasya.”—Mis. 15:23.
Yaŵatesile Filipo
1. Alolele FIDIYO, kapena aŵalanje Masengo 8:30, 31. Kaneko ajanje yiwusyo ayi:
Ana Yaŵatesile Filipo Yikutujiganya Chichi?
2. Naga patukuŵechetana ni mundu ngatukutenda yindu yakulosya kuti tukumkanganichisya kuti tumlalichile, nikuti jwalakwe mpaka aŵe jwagopoka soni mpaka asache kupikana utenga wetu.
Amsyasyeje Filipo
3. Aloleje yayikutendekwa. Aloleje mwajimile mundu kapena yatesile pakutama, mwajikuwonechela ngope jakwe soni yakutenda pakukamulichisya masengo makono gakwe pakuŵecheta. Yeleyi mpaka yakamuchisye kuti ammanyilile chenene mundujo. Ana jwalakwe akulosya kuti akusaka kuŵechetana ni wawojo? Naga yili myoyo mpaka akambilane najo ngani ja m’Baibulo mwagamba kumwusya kuti, “Ana akumanyilila kuti . . . ?” Naga mundu jwine ngakusaka kuŵechetana ni wawojo, akamkanganichisyaga kuti amlalichile.
4. Awusimaneje mtima. Patandite kuŵechetana ni mundu akawutuchilaga kumlalichila. Ajembecheyeje kaje kuti yakuŵechetana ni mundujo yajigalile ku ngani jinejakwe ja m’Baibulo. Ndaŵi sine kuti yeleyi yikomboleche, mpaka asosekwe kwembecheya kuti chamlalichile paulendo wine wachachisimanasoni.
5. Akosecheleje kuchenga. Mpaka yisimanikwe kuti mundu jwakuŵechetana najo atandisye ngani jakuti nganajijembecheyaga. Myoyo aŵeje ŵakoseka kukambilana ni mundujo ngani jampaka jimkamuchisye jwalakwejo. Mpaka atende yeleyi atamose kuti ngani jakukambilanajo jili jakulekangana ni ngani ja m’Baibulo jaganichisyeje wawojo.
ALOLESONI
Jwak. 3:1, 7; 1 Akoli. 9:22; 2 Akoli. 2:17; Akolo. 4:6.
