OMHIIGHOM OGHAẠPH
ESI ITUUGHẠ PHỌ 3
Oḍighi Ghan Iiḅi
Aḍinhị-olhogh: ‘Ephomoghiạn pọ . . . oḍighi ghan iiḅi.’—1 Kọr. 13:4.
Idị AZizọs Aḍighi
1. Pogh VIDIO phọ, obobọ bạl Jọn 9:1-7. Kụ aaḅeghiọn sipuru phọ edaphạn bọ siẹn:
-
(1) AZizọs aphụr aakonhom oye ikpom ariḍien phọ obobọ aphụr aghaạph ilọ iiḅi iinhaghạn phọ aḅenhị nyodị? —Miịn Jọn 9:35-38.
-
(2) Nạ aatughiạn mọ eeghe kụ iḍighi kụ oye phọ anhaghạn bọ oghaạph iiḅi iinhaghạn phọ?
Ipẹ AZizọs Aḍighi Bọ Itughemhị Iyira Eeghe?
2. Ketue ni edugh dị oye kanaghạn iiḅi iinhaghạn phọ eḍighi maạr dị amhiịn mọ yira opomhoghiạn ni nyodị.
Tuughaạny Zizọs
3. Ḍeenhaan ghan igbiririph. Kparaghạ ootughiạn ipẹ oye phọ alhoghoma bọ.
-
(1) Puruan loor mọ: ‘Eeghe iiḅaghamhị kụ edị oye phọ asoman? Eeghe kụ keloghonhaạn nyodị ḍighaạgh eḅilhẹ eḍạ ḍiḅeraạn odị?’ Nạ aḍighi iduọn phọ, keḍeenhaan mọ nạ apomhoghiạn ni oye phọ aḅilhẹ amoọgh ogbolhomaam odị.
-
(2) Eḍighi maạr dị oye aḅenhị nyinhạ ipẹ odị alhoghoma bọ obobọ aghaạph iyaạr dị reeḅaghamhị nyodị, pọ ka/nme oghaạph phọ odị amiteom bọ. Ḍeenhaan mọ nạ apomhoghiạn ni nyodị esi oghiọm aghisigh olher arurụ ongọ odị.
4. Ikpo onhụ phọ anạ eḍeenhaan ghan ephomhoghiạn r’olhọgh eegu. Mem dị nạ amhoọgh ephomhoghiạn aghị esi oye, kụ rawạ ni olhoghonhaạn odị ḍighaạgh, keḍeenhaan ni siphẹ ikpo onhụ phọ anạ. Miigha loor kụ aselẹ ikpo onhụ phọ anạ, r’eten phọ epẹ nạ kakaạph bọ oghaạph phọ. Ka/kaạph raraạr dị kepin olhoghi oye phọ.
5. Loghonhaạn ghan ḍighaạgh. Wạ ghan reten olhoghonhaạn oye phọ ḍighaạgh esi oḍighinhaan odị iyaạr dị odị akạr amhoghi. Oḍighi ghan iiḅi iiḍighi ketue ni eḍighi idị oye phọ kawạ oghaaphạn ayira.
