KIT ME CAKO LOK
PWONY ME 3
Nyut Kica
Cik ma iye lac: “Mar . . . lakica.”—1 Kor. 13:4.
Gin ma Yecu Otimo
1. Nen VIDIO, nyo kwan Jon 9:1-7. I nge meno, tam i kom lapeny magi:
-
Gin ango ma Yecu otimo mukwongo—ocango latowang-ngi nyo onywako kwena maber kwede?—Nen Jon 9:35-38.
-
Pingo itamo ni gin ma Yecu otimo-ni otugo cwiny laco man me winyo lok me kwena maber?
Pwony Ango ma Wanongo ki Bot Yecu?
2. Ngat moni twero ye winyo kwenawa ka en oniang ni waparo pire.
Lub Lanen pa Yecu
3. Tem goyo kit ma ngat meno winyo kwede.
-
Pennye kekeni ni: ‘Gin ango ma en romo bedo ni tye ka parone? Ngo ma en twero nongo ni tye me kony dok gudo cwinye?’ Timo meno bikonyi me nyuto kica ma a ki i cwinyi kikome kun pe idido lok adida.
-
Nyut ni iparo pi gin ma pire tek bot ngat meno ki ciko iti me winyo lokke. Ka en otitti kit ma en winyo kwede i kom gin mo nyo otito peko ma en tye ka kato ki iye, pe icak lok i kom gin mukene.
4. Lok i yo me kica dok ki woro. Ka iparo pi dano meno dok itye ki miti me konye, ci en biwinyone woko ki i dwani. Yer nyig lok kacel ki dwan ma ibitiyo kwede ki diro, dok igwokke ki waco lok ma twero cwero cwiny ngat meno.
5. Mi kony. Yeny kare mupore me konyo ngat meno. Ka watimo jami ma nyuto kica bot ngat moni, ci twero weko en bedo ki miti me lok kwedwa.
