BƆ NƐ O MAA JE NÍ SƐƐMI SISI HA
NÍ KASEMI 3
Mo Je Mi Mi Jɔmi Kpo
Sisi Tomi Mlaa: “Suɔmi . . . mi mi hi.”—1 Kor. 13:4.
Nɔ́ Nɛ Yesu Pee
1. Moo hyɛ VIDEO ɔ, aloo moo kane Yohane 9:1-7. Lɔ ɔ se ɔ, mo susu sane bimihi nɛ nyɛɛ se ɔmɛ a he:
-
Benɛ Yesu na nyumu ɔ nɛ e hɛngmɛ yu ɔ, anɛ e tsa lɛ amlɔ nɔuu aloo e kɛ lɛ sɛɛ sane kpakpa a he ní?—Moo hyɛ Yohane 9:35-38.
-
Mɛni he je nɛ o susu kaa nyumu ɔ suɔ kaa e maa bu Yesu tue ɔ?
Mɛni Wa Kaseɔ Ngɛ Yesu Nɔ Hyɛmi Nɔ́ Nɛ ɔ Mi?
2. Ke nɔ ko na kaa wa susuɔ e he ɔ, eko ɔ, lɔ ɔ ma ha nɛ e bu wa sɛ gbi ɔ tue.
Moo Kase Yesu
3. Bɔɔ mɔde kaa o maa nu nɔ ɔ sisi.
-
Bi o he ke: ‘Mɛni nɛ eko ɔ, e maa hi he susue be nɛ ɔ mi? Mɛni nɛ eko ɔ, e maa ye bua lɛ nɛ́ e bua maa jɔ he?’ Ke o pee jã a, lɔ ɔ maa ye bua mo nɛ o maa je o tsui mi kɛ je mi mi jɔmi kpo ngɛ blɔ nɛ hi pe kulaa nɔ.
-
Moo bu nɔ ɔ tue kɛ tsɔɔ kaa o susuɔ e he. Ke nɔ ko de mo bɔ nɛ e nuɔ he ha ngɛ nɔ́ ko he aloo e de mo nyagba ko nɛ e kɛ ngɛ kpee ɔ, ko tsake ní sɛɛmi ɔ.
4. O kɛ nihi nɛ tu munyu ngɛ bumi mi. Ke o mi mi sãa mo ngɛ nɔ ɔ he nɛ o suɔ nɛ o ye bua lɛ ɔ, o munyu tutui maa tsɔɔ. Susu nɔ́ nɛ o ma de kɛ bɔ nɛ o ma de lɛ ha a he saminya, nɛ ko de nɔ́ ko nɛ ma gba e nya.
5. Moo pee nɔ́ ko kɛ ye bua lɛ. Mo hla blɔhi a nɔ nɛ o maa gu kɛ ye bua nɔ ɔ. Ke o jeɔ mi mi jɔmi kpo ɔ, lɔ ɔ ma ha nɛ nɔ ɔ maa suɔ kaa e kɛ mo maa sɛɛ ní.
