Dawˬ ngehˬ cawˬ dahˬ beh˗eu
Dzaw deuˆ 3
G’awˬ shaˬ gaˬ
Jaˇliꞈ zahˇ: ‘G’oeˇ˗eu gaˬ˗eu jeˬ˗aˬ, aˬ cawˬ˗ahˇ g’awˬ shaˬ gaˬ nya˗eu meh.’—1 Gawˇliˬtu 13:4.
Yeˬsuˇ aˬ jeˬ jahˇ˗euˬ nga?
1. Biˬdiˬoˬ˗ahˇ haw, maˬ ngeuˇ naˇ Yoˇhaˬ 9:1-7-ahˇ gui. Jiˇ naˇ, naˇ haˬ˗eu jeˬ heu deuˬ˗ahˇ shaˇ noeˬ:
-
Yeˬsuˇ aˬ jeˬ jeˬ hu jahˇ˗euˬ nga? Myaˆ behꞈ˗ahˇ jeˬ hu laˆ saˆ˗euˬ nga laˬ? Maˬ ngeuˇ naˇ jeˬ hu tsaꞈ gaˬ˗euˬ nga laˬ?—Yoˇhaˬ 9:35-38-ahˇ haw.
-
Tsawˇ haˬ heu g’aˬ Yeˬsuˇ guiˬ lahˬ dawˬ tsaꞈ gaˬ gaˇ aˬ jeˬ miˇ neh naˇ haˬ mawꞈ˗eu nga?
Yeˬsuˇ˗ahˇ neh aˬ jeˬ ya siˬ˗eu nga?
2. Aˬ dui aˬ yawꞈ˗ahˇ nui ma ahˇ˗eu lehˇ siˬ leˇ naˇ, aˬ yawꞈ guiˬ lahˬ dawˬ˗ahˇ naˇ haˬ mawꞈ dzehˬ laˇ˗eu meh.
Yeˬsuˇ˗ahˇ dzaw geuꞈ
3. G’awˬ shaˬ gaˬ. Aˬ cawˬ˗euˬ jawˇ duˬ˗ahˇ jawˇ˗awˇ shaˇ noeˬ nehˬ.
-
Heu loꞈ˗ehˇ shaˇ noeˬ haw: ‘Aˬ yawꞈ aˬ jeˬ gaˇ kawˆ˗ahˇ k’ahˬ lahˇ luꞈ˗eu nga? Aˬ jeˬ gaˇ kawˆ ja nehˬ naˇ aˬ yawꞈ nui ma ahˇ˗eu nga? Aˬ yawꞈ˗ahˇ caw ba nehˬ nya˗eu jeˬ naˇ aˬ jeˬ nga?’ Teu loꞈ˗ehˇ shaˇ noeˬ˗eu teu naˇ, aˬ dui˗ahˇ aˬ yawꞈ maꞈ˗ahˇ maˇ diˇ nui ma ahˇ˗eu lehˇ mˇ mawˇ nya ni caw ba nehˬ laꞈ˗eu jeˬ pyeuꞈ meh.
-
Aˬ yawꞈ maꞈ ngehˬ gaˇ yaw muiˬ˗ehˇ naˇ haˬ nehˬ˗eu heu neh g’awˬ shaˬ gaˬ˗eu lehˇ mˇ mawˇ. Aˬ yawꞈ maꞈ˗euˬ nui ma laꞈ k’oeˇ pyeuꞈ luꞈ˗eu jeˬ hawˇ˗eu aˬ yawꞈ maꞈ˗euˬ shaˬ zahˬ gaˇ kawˆ dzawˇ nehˬ laꞈ ngeh, dawˬ taˬ ngehˬ tsoeˬ leˇ.
4. Nahˬ yu ni yaw zeu baw˗eu laꞈ k’oeˇ ngehˬ. Aˬ dui˗euˬ ngehˬ jeˬ ngehˬ kawˆ heu naˇ, aˬ cawˬ˗ahˇ maˇ diˇ g’awˬ shaˬ gaˬ ngaˇ˗a laˬ, maˇ diˇ caw ba nehˬ mawꞈ ngaˇ˗a laˬ lehˇ bi siˬ laˇ˗eu meh. Teu miˇ neh dawˬ zmˬ jeˬ zmˬ kawˆ hawˇ˗eu teˇ saˇ zmˬ jeˬ zmˬ kawˆ saˇ tiˇ yaw muiˬ˗ehˇ taˬ. Aˬ cawˬ˗ahˇ nui ma pehˇ leˇ paˬ˗ehˇ g’eh˗eu dawˬ maˬ ngehˬ ni yahˇ.
5. Caw ba nehˬ. K’aˇ yehꞈ laˇ˗eu loꞈ˗ehˇ caw ba nehˬ. Teu loꞈ˗ehˇ g’awˬ shaˬ gaˬ˗eu jeˬ mˇ mawˇ˗eu teu naˇ, aˬ yawꞈ maꞈ nehˬ˗ehˇ dawˬ ngehˬ cawˬ˗eu awˬ dzehˬ laˇ˗eu meh.
