IBEBENE UKPATU
INU NKWEEN̄ 3
Ijejeen̄ Ata Ejit
Onineen̄ Baibul: “Ogwu òmun̄ ene me chieen̄ . . . ikikaan̄ ata ejit me lek ene.”—1 Kọr 13:4.
Inu Jisọs Orọbe
1. Kpọ FIDIO yi, mè iyaka ire fuk Jọn 9:1-7. Mè fọọk idodo chi ogọgọọk:
-
Keke ke Jisọs odasi irọ, ire igwagwa ogwu nnaan̄ ya sa ilolook ata etip inyi ọmọ?—Kpọ Jọn 9:35-38.
-
Keke orọ ubọk Jisọs osabe irọ inu me lek ogwu enerieen̄ ya oborọ ibe iweek igbagban̄ ata etip?
Keke Ke Eji Ekween̄ Inan̄a Me Lek Jisọs?
2. Ene moweek igbagban̄ etip kiji ire imun̄ ibe ke eji mikaan̄ ulọk me lek kan̄.
Gọọk Akpat Ukot Jisọs
3. Tap lek kwun̄ me irek ene ya. Sa inyi okọt okeek ubọk inu okupbe me lek ene ya.
-
Do lek kwun̄ ibe: ‘Keke ke ikikeek mkpọ ofolek? Keke obotap ubọk inyi ọmọ mè iyaka ire itop ọmọ me lek?’ Ikekirọ ikeya motap ubọk inyi owu ojeen̄ ata ejit eyi obonan̄a me ijọn̄ ijọn̄ ejit kwun̄.
-
Jeen̄ ibe ke inu okisisaak ọmọ ikup owu me ufiak sa me igbagban̄ utọn̄ me lek kan̄. Ire ene ya itumu inyi owu ubọk inu ge okup ọmọ me lek mè iyaka ire ikpa ufialek ge ikichichini inyi owu, kanwene ibot usem ya.
4. Sa ata ejit mè ulibi tumu usem. Osikaan̄ njijin̄ me lek ene ya mè ichubọk iweek itatap ubọk inyi, mojeen̄ me lek usem okitumu. Gobo usem obotumu jaan̄ mè sa me ata ida tumu, mè jit ikekitumu usem obonaan̄ ene ejit.
5. Kitap ubọk nyi ene. Week irek ogbegbe isasa itap ubọk inyi ene ya. Ijejeen̄ ata ejit mokọt ichili oniin̄ inyi eji isasa igọọk ene ikpa usem.
