DIHANG MAGSUGOD UG PANAG-ESTORYA
LEKSIYON 3
Pagkamaayo
Prinsipyo: “Ang gugma . . . maayo.”—1 Cor. 13:4.
Ang Gihimo ni Jesus
1. Tan-awa ang VIDEO, o basaha ang Juan 9:1-7. Dayon konsideraha ang mosunod nga mga pangutana:
-
Unsay unang gihimo ni Jesus—giayo ang tawong buta o gisangyawan kini sa maayong balita?—Tan-awa ang Juan 9:35-38.
Unsay Atong Makat-onan Kang Jesus?
2. Ang usa ka tawo lagmit maminaw sa atong mensahe kon bation niya nga naghunahuna ta sa iyang kaayohan.
Sundoga si Jesus
3. Magpakitag empatiya. Imadyina kon unsay gibati sa imong kaestorya.
-
Pangutan-a ang kaugalingon: ‘Unsa kahay iyang gikabalak-an? Unsa kahay makatabang ug makapainteres niya?’ Motabang ni nimo sa pagpakitag kaayo sa natural ug sinserong paagi.
-
Paminawa siya. Pinaagi niini, imong gipakita nga gihatagan nimog pagtagad ang butang nga importante kaniya. Kon sultihan ka niya sa iyang opinyon bahin sa usa ka butang o sa problema nga iyang giatubang, ayawg usba ang topiko.
4. Sulti sa buotan ug matinahoron nga paagi. Kon naluoy ka sa imong kaestorya ug gusto gyod nimo siyang tabangan, makita na sa imong paagi sa pagsulti. Pag-amping kon unsay imong isulti ug kon unsaon nimo kini pagsulti, ug ayawg hisgoti ang mga butang nga posibleng masakitan siya.
5. Magmatinabangon. Pangitag haom nga kahigayonan nga makatabang ka sa praktikal nga paagi. Kon magpakita tag kaayo, lagmit maminaw nato ang atong kaestorya.
