BIAHRAM THAWKNAK
John 9:1-7
CAWN DINGMI 3
Zaangfahnak Ngei
Baibal Phunglam: “Dawtnak cu . . . zaangfahnak a ngei.”—1 Kor. 13:4.
Jesuh Nih Zeidah A Tuah?
1. VIDEO kha zoh asiloah Johan 9:1-7 rel. Cun a tanglei biahalnak hna hi i ruah u:
-
Jesuh nih mitcaw pa kha a damter hmasa maw asiloah thawngṭha dah a chimh hmasa?—Johan 9:35-38 zoh.
-
Mah mipa nih Jesuh chimmi thawngṭha ngaih a duhmi cu zeicah a si tiah na ruah?
Jesuh Sinin Zeidah Kan Cawn Khawh?
2. Mi pakhat nih a kong he aa tlaiin siaherhnak kan ngei tiah a ruah ahcun kan chimmi thawngṭha kha ngaih a duh deuh lai.
Jesuh Kha I Zohchunh
3. Amah hmun ah i umter chun. A intuar ning kha hngalhthiam awkah i zuam.
-
Hitin i hal: ‘A lungre a theihmi cu zei kong dah a si khawh men? Zeidah a caah bawmtu a si khawh i zeinihdah a bawmh khawh?’ Cutin i halnak nih a cung ah lungtak te le aa tlak ning in zaangfahnak langhter awkah aan bawmh lai.
-
A bia ngaihpiak. Cutin na tuah ahcun a caah a biapimi kong he aa tlaiin siaherhnak na ngeih kha na langhtermi a si. A intuarnak kong asiloah a tonmi harnak kong aan chimh ahcun a konglam kha thlenpiak hlah.
4. Zaangfahnak le upatnak he chim. Mi pakhat nih a cung ah zaangfahnak na ngei ti le bawmh na duh taktak ti kha na biachim ning in a theih khawh. Cucaah na chimmi kong le na chim ning kha i ralring, cun midang thin a hunter khomi bia chim kha hrial.
5. Bawmtu si. Mi pakhat kha a ṭhami lam in na bawmh khawh nakhnga aa tlak tik paoh ah caanṭha kawl. Zaangfahnak kan langhter ahcun mi pakhat nih kanmah he biaruah kha a duh deuh lai.
MAH BAIBAL CAANG ZONG HI ZOH
Rom 12:15, 16; Gal. 6:10; Heb. 13:16
