BARO DAMINƐTƆ NI MƆGƆW YE
KALANSEN 3
Ɲumanya
Sariyakolo: “Kanuya be mɔgɔ min dusu la, o tigi be . . . koɲuman kɛ.”—1 Kor. 13:4.
Yezu y’a kɛ cogo min na
1. VIDEWO filɛ wala Zan 9:1-7 kalan. O kɔ, ɲiningali nunu jaabi:
-
Yezu kɔnna ka fiyentɔcɛ kɛnɛya walima a kɔnna ka kibaro diiman lo kofɔ a ye?—Zan 9:35-38 lajɛ.
-
Yezu ye koow kɛ cogo min na, mun na an be se k’a fɔ ko n’a sɔrɔ o y’a to o cɛɛ sɔnna kibaro diiman ma?
An be kalan min sɔrɔ Yezu fɛ
2. Ni mɔgɔ dɔ y’a ye ko i b’i mako donna ale la, a bena diya a ye k’i lamɛn.
Yezu ladegi
3. I yɛrɛ bila a tigi nɔɔ na. Miiri k’a filɛ a dusukunnakow ye min ye.
-
I yɛrɛ ɲininga ko: “A jɔrɔnanko ye mun lo ye? Mun lo kɔrɔtanin lo a fɛ ani a mako be mun lo la?” O bena i dɛmɛ k’a tigi minɛ ni ɲumanya ni kɔnɔgwɛ ye.
-
A lamɛn. O la, i b’a yira ko min kɔrɔtanin lo a fɛ, i b’i janto o la. N’a b’a ka miiriya wala a ka gwɛlɛya dɔ kofɔra i ye, kana baro yɛlɛma.
4. Kuma a fɛ ni ɲumanya ni bonya ye. N’i b’i janto a tigi la ani n’i b’a fɛ k’a dɛmɛ sɔbɛ la, a bena o ye i kumacogo fɛ. I be min fɔ ani i b’o fɔ cogo min na, i janto o la.
5. I yɛrɛ labila k’a dɛmɛ. Sababu ɲumanw ɲini k’a dɛmɛ cogo tigitigi dɔw la. N’an b’a tigi minɛ ni ɲumanya ye, a ka teli ka sɔn k’an lamɛn.
