NTE ỌKPỌTỌN̄ỌDE NNEME
UKPEPN̄KPỌ 3
Fọn Ido
Se Bible Etịn̄de: “Ima . . . ọfọn ido.”—1 Cor. 13:4.
Se Jesus Akanamde
1. Se VIDIO emi, mîdịghe kot John 9:1-7. Ekem bọrọ mme mbụme emi:
-
Nso idi akpa n̄kpọ emi Jesus akanamde—ndi enye ekebem iso ọkwọrọ ikọ m̀mê ekebem iso anam ete oro okụt usụn̄?—Se John 9:35-38.
-
Nso inam ekere ke se Jesus akanamde oro ama enen̄ede anam ete oro ama ndikop Ikọ Abasi?
Nso ke Ikpep Ito Jesus?
2. Edieke owo emi itịn̄de ikọ inọ ọdiọn̄ọde ke imekere iban̄a imọ, oro ekeme ndinam enye ama ndikop Ikọ Abasi.
Kpebe Jesus
3. Kere ban̄a owo oro etịn̄de ikọ ọnọ. Domo ndikere nte etiede enye ke idem.
-
Bụp idemfo ete: ‘Nso ifịna enye? Nso ke n̄kpetịn̄ emi edin̄wamde enye, edinyụn̄ inemde enye ndikop?’ Ndinam oro ayanam ekeme ndifọn ido ye owo oro onyụn̄ owụt ke emenen̄ede ekere aban̄a enye ke ofụri esịt.
-
Kpan̄ utọn̄ kop se enye editịn̄de. Edieke anamde emi, ọwọrọ emenen̄ede ekere aban̄a se ifịnade enye. Edieke enye etịn̄de se ifịnade enye m̀mê se iwọrọde enye ọnọ fi, kûkpụhọ nneme.
4. Tịn̄ ikọ ukpono ukpono. Edieke mbọm owo anamde fi ndien afo enen̄ede oyom ndin̄wam enye, nte etịn̄de ikọ ayanam enye ọdiọn̄ọ emi. Kpeme se etịn̄de ye nte enịmde uyo etịn̄ ikọ, kûnyụn̄ utịn̄ se idiyatde enye esịt.
5. N̄wam enye. Yom usụn̄ ye ini emi ọfọnde n̄wam owo oro. Edieke ifọnde ido ye owo, oro ekeme ndinam enye ama ndikop Ikọ Abasi.
