MOANAKIN TE MARORO
REIREI 3
Te Akoi
Te boto n reirei: “E akoi . . . te tangira.”—1Kor. 13:4.
Te Baere E Karaoia Iesu
1. Mataku n te TAAMNEI, ke wareka Ioane 9:1-7. Imwina ao nori titiraki aikai:
-
Tera are e karaoia moa Iesu, e kaurea matan te mataki ke e tibwaa moa te rongorongo ae raoiroi nakoina?—Nora Ioane 9:35-38.
-
Bukin tera bwa e kairaki teuaei bwa e na butimwaea te rongorongo ae raoiroi, man ana anga Iesu aei?
Tera Reireiara Mairoun Iesu?
2. E na kan ongora riki te aomata n ara rongorongo ngkana e namakina tabeakinana iroura.
Kakairi Iroun Iesu
3. Kataia n ota n ana namakin te aomata.
-
Titirakiniko aei: ‘Tao tera ae e raraoma iai? Tera ae e kona ni buokaki ao n anaaki nanona iai?’ Ko na buokaki ni karaoan anne bwa ko na kaotiota te akoi n te aro ae riai ao e nako raoi mai nanom.
-
Kaotia bwa ko tabeakina te bae kakawaki iroun te aomata n arom ni kakauongo. Ngkana e kaota ana namakin nakoim ke e taekina te kangaanga ae rinanona, tai bita te maroro.
4. Taetae ma te akoi ao te karinerine. Ngkana ko nanoangaa te aomata ao ko kani buokia ni koaua, e na oti n arom n taetae. Rinei raoi am taeka ao teini bwanaam, ao rarawa n taekini bwaai aika kaun.
5. Ibuobuoki. Ukeri aanga aika ko na buoka iai te aomata anne n te aro ae manena. A kona mwakuri n akoi ni karekea te anga ni maroro.
