PAGSUGOD SA PAG-ISTORYAHANAY
LEKSION 3
Magpakita sing Kaayo
Prinsipio: “Ang gugma . . . mainayuhon.”—1 Cor. 13:4.
Ang Ginhimo ni Jesus
1. Tan-awa ang VIDEO, ukon basaha ang Juan 9:1-7. Dayon binagbinaga ang masunod nga mga pamangkot:
-
Ano ang una nga ginhimo ni Jesus—gin-ayo ang bulag nga tawo ukon ginsugiran sia sang maayong balita?—Tan-awa ang Juan 9:35-38.
-
Sa banta mo, ngaa nangin interesado pa gid ang tawo nga mamati kay Jesus?
Ano ang Matun-an Naton kay Jesus?
2. Kon mabatyagan sang isa ka tawo nga nagaulikid kita sa iya, posible gid nga mamati sia sa aton mensahe.
Iluga si Jesus
3. Magpakita sing empatiya. Hunahunaa kon ano ang ginabatyag sang imo kaistorya.
-
Pamangkuta ang imo kaugalingon: ‘Ano ayhan ang iya ginakabalak-an? Ano ayhan ang pamatyag niya nga makabulig sa iya ukon ang gusto niya istoryahan?’ Kon himuon mo ini, mapakita mo ang kaayo sing natural kag sinsero.
-
Ipakita nga nagaulikid ka paagi sa pagpamati sa iya. Kon nagpautwas sia sa imo sang iya opinyon ukon sang iya problema, indi pagbag-uha ang istorya.
4. Maghambal sing mainayuhon kag matinahuron. Kon naluoy ka sa isa ka tawo kag gusto mo sia buligan, mabatyagan niya ini sa imo paagi sang paghambal. Maghalong sa imo ginahambal kag kon paano mo ini ihambal, kag likawi ang mga tinaga nga makasakit sang iya balatyagon.
5. Magbulig. Mangita sing kahigayunan para buligan sia sa praktikal nga paagi. Kon nagapakita ka sing kaayo, posible gid nga makig-istorya sia sa imo.
