KA TUJCHIJ TIT TʼILOM
AJUMTALÁB 3
Ki tʼajaʼ tu alwaʼ inik
An texto juʼtáj ti kaldhámej: «Jitats u kʼanidhom in tʼajchal i alwaʼtaláb in at kʼwajíl» (1 Cor. 13:4).
Jawaʼ in tʼajaʼ a Jesús
1. Ka tsuʼuw an VIDEO o ka ajiy Juan 9:1-7. Ani talbél ka tʼajaʼ ti kwéntaj axéʼ xi konowixtalábchik:
-
¿Jantʼoj in tʼajaʼ okʼox a Jesús: in jeldhaʼ an inik axi jokʼtsej, o in ólchij an alwaʼ kaw? (Ka tsuʼuw Juan 9:35-38)..
¿Jantʼoj tu exóbchal in tʼiplabil a Jesús?
2. An atikláb neʼets kin leʼnaʼ tu ku otsʼowiy max kin tʼajaʼ ti kwéntaj abal u tʼeʼpinal kʼal jawaʼ in watʼál.
Ka nitsʼbiy a Jesús
3. Ka tejwamédhaʼ abal it tʼeʼpinal kʼal jitaʼ ti otsʼowiyal. Ka tsapnanchij ka exbay jantʼiniʼ tin atsʼál an atikláb.
-
Ka konowiy ta baʼ: «¿Kʼal jantʼoj walám tu tʼeʼpindháb? ¿Jantʼoj walám kin kʼijidhnaʼ o kʼal jantʼoj ka tólmiyat?». Axéʼ xi konowixtalábchik neʼets ti tólmiy abal ka tejwamédhaʼ abal it kʼanidhom ani abal chubax a leʼ ka tólmiy.
-
Max jun i atikláb kʼwajat ti ólchal jantʼiniʼ tin atsʼál o abal in kwaʼal jun i kʼibataláb, ka alwaʼ otsʼowiy ani ka jilaʼ abal kin aynanchij ti ólchij.
4. Ka tejwamédhaʼ i kʼanidhomtaláb ani kʼakʼnaxtaláb kʼal a káwintal. Tam chubax i yajnanchal jawaʼ in watʼál jun i atikláb ani i leʼ ki tólmiy dhubatkʼij i tejwamedhál kʼal i káwintal. Jaxtám, ka tsalpay alwaʼ jantʼoj neʼets ka uluw ani jantʼiniʼ ti neʼets ka uluw. Yab ka uchaʼ jantʼoj axi kin yajnaʼ an atikláb.
5. Ka leʼnaʼ kit tólmixin. Ka aliy jantʼiniʼ ti ka tólmiy an atikláb. Jun i alwaʼ tʼajbiláb in éjtowal kin tʼajaʼ abal kin leʼnaʼ kin atsʼaʼ an alwaʼ kaw.
