DỌMWỤ NYA ẸLA OYAYA Ụ-ỤGBẸYỊ ỌNYỊỊLA
ANG ỌJẸ́JẸ 3
Mẹ Ọnahị Jẹ
Itiwe nya Ehile: “Ọháha . . . kaa kpa ọnahị họ ẹla ẹ-ẹga nya ọngọkịla.”—1 Kọr. 13:4.
Ang Ọlẹ ká IJisọsị Họ
1. Yẹ IFIM ọwẹ, lee wa ịJọn 9:1-7. Ká kụ ẹhị yẹ ịtọ ẹla ileji ịlẹ:
-
Ịyẹ iJisọsị à tị́ họ jene—ọ họ ọlẹng ọ-kpụ idu uda ene lee ọ tị́ ya ẹrụ ọnyịịla joo jene?—Yẹ ịJọn 9:35-38.
-
Ịyẹ tị́ du ká me irya nyori ọlẹng ọwẹ nwụlanọ nyọka ke ụrụ la iJisọsị?
Ẹlịyẹ Ahị Tị́ Jẹ́ Bwu Ẹga nya IJisọsị?
2. Ọ ka kpụ ọngịnyị ịpyọ nyọka ke ụrụ lahị gụ, kori kọ yẹ nyori ahị kpahị jwoo.
Ba Ọgụ-ẹpẹtẹ nya IJisọsị Jẹ
3. Ẹla nya angịkịla a gung ọ-ọkịlẹtụ. Maga ká jẹ́ jaabwọ ká iwe-ahụrụ nya ọngọọwa lọọ.
-
Tịlọng wo wẹẹ: ‘Ịyẹ à tị́ ri akama nyamwụ lẹẹlẹẹ? Ẹlịyẹ à tị́ ka dọọ ụbwọ bala ọ-kpọọ ịpyọ myị?’ Ọ-họ ịnyị ka dang ụbwọ ká ka mẹ ọnahị jẹ bwu ẹpwụ ọkịlẹtụ nyang ụ-ụgbẹyị ọlẹ kọ pwoku.
-
Mẹjẹ nyori a kpahị ju ọngịnyị bwula ọ-ke ụrụ ụka kọ ja ya ẹla. Kori kọ ya jeng jaabwọ kọ lọọ i-irya u-uhye nya ịngịhyẹ lee ọ ya ẹla u-uhye nya akama ọhẹ ọlẹ kọ la, á yẹ oja da ka.
4. Ya ẹla kpẹnẹẹ la ihi ojuju. Kori ká ọngịnyị a lang ahyẹẹrwẹwa ká tị tịtọ nyọka dọọ ụbwọ ịlẹhị, ọngọọwa ka jẹ́ bwula abwọlẹ ká ya ọnụ nọ ya ẹla. Dọmwụ-dọmwụ u-uhye nya ẹla ọlẹ ká ka ya bala abwọlẹ ká ka ya ọnụ nọ yọọ, ká cheji ba hi ọ-ka ya ẹla ịlẹ kị ka wú angịkịla ẹjẹ.
5. Nwụlanọ nyọka dụbwọ. Mwahị nya iwe ọlẹ kọ pwoku nyọka dọọ ụbwọ họ ịngịhyẹ lee ọkịla. Ụka kahị họ ọngịnyị ọnahị, ọọwa ka wụrụ ụgbẹyị nya ẹla oyaya da ẹ-ẹpwarịrị nyahị myị.
