BYA KUTENDEKA MWISAMBO
LUFUNJISHO 3
Ambainga na Lusa
Jifunde: ‘Butemwe . . . buba lusa.’—1 Ko 13:4.
Byaubanga Yesu
1. Tambai VIDYO, nangwa tangai Yoano 9:1-7. Apa bino mwisambe ano mepuzho:
-
Ñanyi kintu kitanshi kyaubile Yesu, nanchi wamubukile patanshi nyi, inyi wamusapwijile mambo awama?—Monai Yoano 9:35-38.
-
Mambo ka uno mwanamulume o akebeshe kuteleka ku mambo awama asapwijilenga Yesu?
Ñanyi Bintu byo Twafunjilako kwi Yesu?
2. Bantu kibapeelela kuteleka ku mambo awama o twibasapwila inge bamona’mba twibata bingi muchima.
Ubainga Byaubanga Yesu
3. Ubilainga bantu lusa. Fwanyikizhainga makatazho abena kupitamo muntu.
-
Iipuzhai’mba: ‘Ñanyi makatazho abena kupitamo uno muntu? Ñanyi bintu byo asakutemwa kabiji bisakumukwasha?’ Inge mwauba bino, kisakukemukwasha kumwesha lusa kufuma panshi ya muchima wenu.
-
Inge mwateleka ku bibena kwamba muntu, ukashiinwa’mba mwamunemeka ne kumuta muchima. Inge wimubuula byo abena kulanguluka pa kintu kimo nangwa wimubuulako lukatazho lo abena kupitamo, kange mwambe pa mutwe ungi ne.
4. Ambainga na lusa ne mushingi. Inge kine mwaubila muntu lusa ne kukebesha kumukwasha, kukamwekela mu ñambilo yenu. Jimukainga na bintu byo mwamba ne mo mwibyambila. Kabiji chinuzhukainga kwamba bintu byafwainwa kuzhingijisha muntu.
5. Kwashainga bantu. Monaingapo mashinda a kukwashishangamo bantu mu byo bakajilwa. Umvwe tuji na lusa, bantu bakakasulukanga bingi kwisamba ne atweba.
