BALTAŊ KANDƆƆ
SUƐI LEBOLII 3
Kɛndɛi
Sawa Mandaa: “Wana nɔ kaalaa wo . . . nɔ kɛndɛi.”—1 Kɔliŋ. 13:4.
Nyɛ Chiisu Tosa Wo
1. Tofa VIDUEIYO, ɔɔ nuawɔ Chɔŋ 9:1-7. Okoŋ ma muli nyunalaŋ ndaŋ:
-
Yɛɛ Chiisu tosa yɛ? Baa o siŋgi fɛlɛŋ po sumɛiyo, ɔɔ yooŋgu kɛndɔɔ fɛlɛŋ o dimul ndu?—Tofa Chɔŋ 9:35-38.
-
Vɛɛ nyɛ Chiisu tosa wo nyindu yɛ po sumɛiyo le ndu nilaŋ yaŋɔɔ?
Yɛɛ Naŋ Pɛɛku yɛ Chiisu o Ba?
2. Waŋndo tiuba mbo yaŋ yooŋgu naŋ cho dimioo wo nilaŋ te o sinaŋ pɛ kɛsɛ maa ŋ nɔ buulaŋ kpeekpeiyo le ndu.
Tol Tamasi Chiisu Wo Kɔɔli
3. Chɔm Nyɛiye le Wana Koŋ. Kindiŋ ma sina mɛɛ o cho sinaŋndo yɛ.
-
Nyunaŋndɔ aa: ‘A yɛɛ okɔɔ o cho yɛ buulaŋndo? Yɛɛ tiu yɛ ba mbo mala ndu, nduyɛ mbo nɛŋi ndu kɔllo suŋ suŋ?’ Hei mala num ma chɔm kɛndɛi o ndu lo, nduyɛ ma mala ndu a kɔllo kpou.
-
A chɔm maa a buulaŋ a waŋndo okɔɔ te a yaŋ ndu pɛ nilaŋ. Te o dimul num pɛ mɛɛ o cho sinaŋndo yɛ, ɔɔ mbo chɔm num bahawɛi ndɔɔ, la suukaŋ a keŋ okɔɔ kinɛi.
4. Soo o nɛi lebɛɛ niŋ. Te a nɔ pɛ nyɛiye le waŋndo, nduyɛ ma yeema le ndu malaa kpeekpei, mi waŋndo sina a mɛɛ ŋ cho isɔɔ o ndu lo yɛ. Hɛli diomnda ŋ cho dimilaŋ nyɛkɛndɛi, nduyɛ ma sina mɛɛ ŋ cho isɔɔ yɛ. Fafaŋ diomnda tɛɛmbuu ndu kɔllo laŋ dimioo.
5. Yɔŋgu malaa. Nuuviaa nɛilaŋ le wana koŋ malaa a nyɛm o hauba woŋ. Kɛndɛi tosa mi la kandu baltaŋ dɔwɔɔ nya waŋndo.