KUBANDA DISOLO
DILONGI 3
Kimpombo
Nsikudukusu: ‘Nzola kele . . . kimpombo.’—1 Bk. 13:4.
Mambu yina Yesu salaka
1. Tala VIDEO, to tanga Yoane 9:1-7. Na manima tadila biuvu yayi melanda:
-
Yinki Yesu salaka na ebandeli—kubelusa muntu yango to kusamunina yandi nsangu ya mbote?—Tala Yoane 9:35-38.
-
Samu na yinki nge mekanisa ti muntu yango vuandaka pene ya kuwa Yesu?
Yinki dilongi beto mebaka na kifuani ya Yesu?
2. Muntu kevuanda mpenza pene ya kuwa nsangu na beto kana yandi kena kumona ti beto kena kutudila yandi dikebi.
Landa kifuani ya Yesu
3. Kukitula na kisika ya muntu. Meka kukanisa mutindu muntu yango kena kukimona.
-
Kukiyuvusa: ‘Yinki mambu lenda tungisa yandi? Yinki mambu lenda vuanda mfunu mpe lenda sepedisa yandi?’ Kusala mutindu yina kesadisa nge samu nge monisa kimpombo na mutindu mebonga mpe na kedika.
-
Monisa ti nge kena kutula dikebi na mambu yina kele mfunu samu na muntu na kuwaka yandi. Kana yandi metubila nge mutindu yandi kena kukimona mpe diambu mosi yina yandi kena kukutana na yau, kusoba ve disolo.
4. Tuba na kimpombo mpe na luzitu. Ntangu nge kena kumonisa ntima kiadi na muntu yango mpe nge kele mpenza na nsatu ya kusadisa yandi, yandi kemona yau na mutindu na nge ya kutubila. Keba samu na mambu yina nge kena kutuba mpe mutindu nge kena kutubila yau, mpe manga kutuba mambu yina kesala yandi mpasi.
5. Pesa lusadusu yina mebonga. Sosa maluaku ya mbote samu na kusadisa muntu yango na mitindu yina mebonga. Kusala mambu na kimpombo lenda zibula nzila samu na kubanda disolo.
