ເລີ່ມລົມ
ບົດທີ 3
ເມດຕາກະລຸນາ
ຫຼັກການ: “ຄວາມຮັກ . . . ເມດຕາ.”—1 ກຣ. 13:4
ສິ່ງທີ່ພະເຢຊູເຮັດ
1. ເບິ່ງ ວິດີໂອ ຫຼືອ່ານໂຢຮັນ 9:1-7. ແລ້ວຕອບຄຳຖາມຕໍ່ໄປນີ້:
-
ກ. ພະເຢຊູເຮັດຫຍັງກັບຄົນຕາບອດ ເພິ່ນເວົ້າເລື່ອງຂ່າວດີກັບລາວເລີຍບໍຫຼືປິ່ນປົວລາວກ່ອນ?—ເບິ່ງໂຢຮັນ 9:35-38
-
ຂ. ເປັນຫຍັງເຈົ້າຈຶ່ງຄິດວ່າຜູ້ຊາຍຄົນນັ້ນເຕັມໃຈຟັງພະເຢຊູ?
ເຮົາໄດ້ບົດຮຽນຫຍັງຈາກພະເຢຊູ?
2. ຜູ້ທີ່ເຮົາລົມນຳອາດຈະຟັງສິ່ງທີ່ເຮົາເວົ້າຫຼາຍຂຶ້ນຖ້າລາວຮູ້ສຶກວ່າເຮົາສົນໃຈລາວແທ້ໆ.
ຮຽນແບບພະເຢຊູ
3. ເຫັນອົກເຫັນໃຈຄົນທີ່ເຮົາລົມນຳ. ພະຍາຍາມຄິດເບິ່ງວ່າລາວຮູ້ສຶກແນວໃດ.
-
ກ. ໃຫ້ຖາມໂຕເອງວ່າ: ‘ລາວອາດກັງວົນເລື່ອງຫຍັງ? ເລື່ອງໃດອາດມີປະໂຫຍດແລະໜ້າສົນໃຈສຳລັບລາວ?’ ການເຮັດແບບນີ້ຈະຊ່ວຍເຈົ້າໃຫ້ສະແດງຄວາມເມດຕາກະລຸນາໄດ້ຢ່າງເປັນທຳມະຊາດແລະຈິງໃຈ.
-
ຂ. ຟັງລາວ. ເມື່ອເຈົ້າເຮັດແບບນີ້ ເຈົ້າກໍສະແດງໃຫ້ເຫັນວ່າເຈົ້າໃສ່ໃຈໃນສິ່ງທີ່ສຳຄັນສຳລັບລາວ. ຖ້າລາວບອກເຈົ້າວ່າລາວຮູ້ສຶກແນວໃດກ່ຽວກັບບາງສິ່ງບາງຢ່າງຫຼືເວົ້າເຖິງບັນຫາທີ່ລາວກຳລັງເຈິຢູ່ ຂໍຢ່າຟ້າວປ່ຽນເລື່ອງ.
4. ເວົ້າແບບສຸພາບແລະໃຫ້ກຽດ. ເມື່ອເຈົ້າຮູ້ສຶກເຫັນອົກເຫັນໃຈຕໍ່ຜູ້ທີ່ເຈົ້າລົມນຳແລະຢາກຊ່ວຍເຫຼືອລາວແທ້ໆລາວກໍຈະຮູ້ສຶກໄດ້ຈາກນ້ຳສຽງຂອງເຈົ້າ. ລະວັງກ່ຽວກັບວິທີແລະສິ່ງທີ່ເຈົ້າເວົ້າ ແລະບໍ່ເວົ້າສິ່ງທີ່ອາດເຮັດໃຫ້ລາວຮູ້ສຶກບໍ່ດີ.
5. ພ້ອມຈະຊ່ວຍເຫຼືອ. ຊອກຫາໂອກາດທີ່ເໝາະສົມໃນການລົງມືຊ່ວຍເຫຼືອລາວ. ເວລາເຮົາໃຈດີນຳຜູ້ໃດ ຜູ້ນັ້ນກໍຢາກຈະລົມນຳເຮົາຫຼາຍຂຶ້ນ.