MWA KUSHILWILA MĪSAMBO
KIFUNDWA 3
Ikala na Kanye
Musoñanya: “Buswe budi na . . . kanye.”—1 Ko. 13:4.
Byālongele Yesu
1. Tala VIDEO, nansha kutanga Yoano 9:1-7. Kupwa londolola bino bipangujo:
-
Le kintu kibajinji kyālongele Yesu, i kundapa mwana-mulume mpofu’ni nansha i kumusapwila myanda miyampe?—Tala Yoano 9:35-38.
-
Mwanda waka byālongele Yesu byālengeje uno muntu etabije myanda miyampe?
Ñeni Yotuboila Kudi Yesu
2. Muntu ukasangela kuteja musapu wetu shi wamone amba tumutele mutyima.
Iula Yesu
3. Witūle pa kyaba kya muntu. Tompa kufwatakanya mwawiivwanina.
-
Wiipangule amba: ‘Le i bika bimukambakanya? Lelo i bika bibwanya kumukwasha ne i bika byabwanya kusangela?’ Kulonga namino kukakukwasha ulombole kanye mu muswelo muyampe.
-
Lombola’mba utele muntu mutyima na kumuteja. Shi wakusapwila mwawiivwanina pa kintu kampanda nansha kukulombola makambakano aekonda nao, kokashinta mīsambo kowisambila pa myanda mikwabo.
4. Wisambe na kanye kadi bya bulēme. Muswelo owisamba ukalombola’mba umwivwanine lusa, ne amba bine usakanga kumukwasha. Nanshi tonga bishima senene ne kwisamba mu muswelo muyampe, kadi leka kwisamba bintu bibwanya kumulobeja.
5. Mukwashe. Kimba’ko mikenga miyampe ya kukwasha’mo muntu mu muswelo mupotoloke. Bilongwa bya kanye bibwanya kulengeja muntu etabije kwisamba netu.
