KUSHANGUMUKA KUSIMUTWIYA NA BANU
CILONGESA 3
Ngozi
Cinangulo: “Cizemo cili . . . na ngozi.”—1 Kori 13:4.
Bika Byalingile Yesu?
1. Kengeni VIDIO, nambe kutanda Iwano 9:1-7. Kutundaho, singanyekeseseni ha bihula binatako:
-
Bika byashangumukile kulinga Yesu, kukangwisa uje munalume wa kapuputwa indi kumuleka tahi muzimbu waubwa?—Taleni Iwano 9:35-38.
-
Mwafwa bika twendeka ngwetu byuma byalingile Yesu byalingisile uje munalume atambule muzimbu waubwa?
Bika Bitulilongesa Kuli Yesu?
2. Munu asa kutambula mwamubwa muzimbu wetu nga aliziba ngwendi twamwaka mbunge.
Tembwinineni Yesu
3. Muzibileni ngozi. Lingeni ngwe muli na kuziba mwali na kulizibila.
-
Lihuleni ngweni: ‘Bika binamushotesa mbunge? Bika byasa kumukwasa nambe kumweta ku mbunge?’ Kulinga ngoco kumikwasa mumwese ngozi ya busunga.
-
Nga munu amileka mwali na kulizibila ha cuma cimo nambe nga amileka bukalu bwali na kuliwana nabwo, keti mushangumuke kusimutwiya byeka. Nga mumutolilila mwamubwa, co mumumwesa ngweni munamwaka mbunge na kumona byendeka kupwa bya seho.
4. Endekeni mu cizemo na mukasingimiko. Munu amizibila ku endekesi yeni nga muli na kumuzibila mema ku mbunge, co lalo mushaka kumukwasa. Anguleni mwamubwa majwi amwendeka na kwendeka na lijwi lyalibotsi. Keti mwendeke byuma bimufutula ku mbunge.
5. Mukwaseni. Tondeni bingila bya kumukwaselamo. Kumwesa munu ngozi kwasa kutulingisa tushangumuke kusimutwiya nendi.
