WIˈIXË JÄˈÄY NMËTMAYTYAKTSOˈONËM
LEKSION 3
Nˈokˈijtëm oyjyaˈay
Biiblyë jyënaˈany: “Diˈibë myëdäjtypy ja tsojkën, […] oy jyaˈayˈaty” (1 Kor. 13:4).
¿Ti tyuunë Jesus?
1. Ixë BIDEO o käjpxë Fwank 9:1-7, ets winmay mëdiˈibë yä yajtëëpy:
-
¿Ti jawyiin tyuunë Jesus: yaˈijxëˈk ja yetyëjk o tyukmëtmaytyak ja Diosë yˈayuk? (Käjpxë Fwank 9:35-38).
-
¿Tiko ja yetyëjk tmëdoowˈijty mëdiˈibë nety ja Jesus nyimaytyakypy?
¿Ti xytyukniˈˈijxëmë Jesusë yˈijxpajtën?
2. Ko jäˈäy tˈixët ko nmëmäˈäy nmëdäjëm, ta niˈigyë tmëdoowˈitäˈänët ja Diosë yˈayuk.
Panëjkxë Jesusë yˈijxpajtën
3. Yaˈixëdë ko mjaygyujkëp wiˈix nyayjyawëty. Winmay wiˈixëdaa ja jäˈäy nyayjyawëty.
-
“¿Tijatyëdaa myëmaapy myëdajpy? ¿Tidaa mbäät tˈoymyëdoy o pyudëkëty?”. Ko duˈun xywyinmayët yëˈë mbudëkëyanëp parë mˈitët oyjyaˈay.
-
Parë ja jäˈäy tˈixët ko mëjpëjktakypy ja yˈamay jyotmay mëdiˈibë jam mdukmëtmaytyakëp, mëdoowˈit yajxon ets kyaj xyajtëgatsët ja maytyaˈaky.
4. Ajëëky amëguˈuk mjäˈäyˈatët ets käjpx mmaytyäˈäk wintsëˈkën myëët. Yajmëdoop ko tuˈugë jäˈäy nbaˈˈayoˈowëm ets ko nbudëkëyäˈänëm. Pääty winmay yajxon ti ääw ti ayuk myajtunaampy, net kyaj xyajtunët ja ääw ayuk mëdiˈibë axëëk yajnayjyawëdëp.
5. Pudëkë. Ëxtäˈäy ja winmäˈäny wiˈix mbäät xypyudëkë ja jäˈäy. Ko mˈitët oyjyaˈay, mbäät ja jäˈäy niˈigyë mmëtkäjpxäˈän mmëtmaytyäˈägäˈänëdët.
