UPACERIHA UWOOPANA MWAHA ATTHU
MWAHA 3
Unamaana
Ikano: “Ntthu oofenta . . . naapanka citthu comaana.”—1 Akor. 13:4.
Isiyani Yesu yaapankilyaawe?
1. Moone IVIDIYU awula nsome Joau 9:1-7. Mwamalihaka, mwaakhule ala makohwaala:
-
Isiyani Yesu yaapacenryaawe upanka—unvoniha nlopwana ahoonoole awula unlalyeera ihapari comaana?—Nwehe Joau 9:35-38.
-
Woonela winyu, kontha isiyani Yesu upanka wawe commo ahomwiiriha uyo nlopwanooyo upheela wiiwa ihapari comaana?
Ntakihero na Yesu ninniitthuciha isiyani?
2. Atthu unaahala waacivela ni upheela uviriyana ihapari cinaalalyeereehu yoonaka wiira ninawaawacera saana.
Muntakihe Yesu
3. Mmoonihere uthunku ntthuuyo. Mmananihe wuupuwela unari wiira itthu inonkhumelela ntthuuyo thi nyuuva inookhumelelani; ni muupuwele mananna uyo ntthuuyo cineecoonaawe.
-
Mwiikohe co: ‘Citthuni uyo cinonkhaliha ni masukhuli? Isiyani yaahala uncivela ni yaahalaawe woona ukhala yofayita ula ukatyuula?’ Wuupuwela commo unaahala wuukaviherani uthoonyera unamaana, wuuluma nimananna omaana ni owoonihera wiira nnanwacera.
-
Wakhala wiira ntthuuyo nawuuluma awula nawuuhimeryani marikariko anonkhumelela muukumini wawe, munviriyane ni nhipacere wuuluma itthu ikhwaawe. Mwanviriyanaka, nnaahala uthoonyera wiira nnanwacera.
4. Muulume nthoonyeraka unamaana ni ihisima. Wakhalaka wiira nyuuva nnaamoonela uthunku ni nnaapheela unkavihera, iyo itthwiiyo inaahala woonannya nimananna nyuuva nnomuulumaneenyu. Phimaana, unaareera uwehacera ratta itthu inhaleenyu wuuluma ni mananna cinhaleenyu wuuluma. Nhulume citthu cinhala unveeha ntthuuyo.
5. Munkavihere ntthuuyo. Muupuwele saana wakhala wiira ihaavo itthu inlamuliyeenyu upanka wiira munkavihere. Uthoonyera unamaana unaahala umwiiriha ntthu wuuhulelani mikhora nihuku nikhwaawe.
