UKUQALISA INGXOXO
ISIFUNDO 3
Woba Lomusa
Isimiso: ‘Uthando lulomusa.’—1 Khor. 13:4.
Okwenziwa NguJesu
1. Bukela IVIDIYO, kumbe ubale uJohane 9:1-7, ubusuphendula imibuzo elandelayo:
-
UJesu waqala ngokusilisa indoda eyisiphofu yini kumbe ngokuyitshela izindaba ezinhle?—Khangela uJohane 9:35-38.
-
Okwenziwa nguJesu kwayinceda njani indoda le ukuthi ibe lesifiso sokuzwa izindaba ezinhle?
Sifundani Kulokho Okwenziwa NguJesu?
2. Kuba lula ukuthi umuntu alalele izindaba ezinhle nxa angabona ukuthi silendaba laye.
Lingisela UJesu
3. Woba lozwelo. Zama ukuzwisisa indlela azizwa ngayo.
-
Zibuze: ‘Kuyini okungabe kumkhathaza? Kuyini engingakuxoxa laye okuzamnceda?’ Ungenza njalo uzabona ukuthi ulomusa sibili lokuthi uyamthanda.
-
Nxa umuntu angakutshela indlela azizwa ngayo kumbe ngohlupho alalo, ungayitshintshi indaba kodwa mtshengise ukuthi ulendaba laye ngokumlalela.
4. Khuluma ngendlela elomusa futhi etshengisa inhlonipho. Indlela okhuluma ngayo izatshengisa ukuthi ulozwelo njalo ufuna ukumncedisa. Khetha kuhle amazwi akho futhi uwabeke kuhle. Ungakhulumi amazwi angamcaphula.
5. Mncede. Zama ukudinga ukuthi ungamncedisa njani ngalokho akudingayo. Nxa ungaba lomusa kuba lula ukuthi umuntu axoxe lawe.
