TAMEKA OONKUNDATHANA
OSHILESHWA 3
Popya nolukeno
Ekotampango: ‘Ohole oyi na olukeno.’ — 1 Kor. 13:4.
Shoka Jesus a li a ningi
1. Tala OKAVIDIO, nenge wu leshe Johannes 9:1-7. Opo ihe to yamukula omapulo taga landula:
-
Tango Jesus okwa li a ningi shike? Mbela tango okwa aludha omulumentu omuposi nenge okwe mu lombwele onkundana ombwanawa? — Tala Johannes 9:35-38.
-
Mbela sho to dhiladhila, oshike shi inyengitha omulumentu omuposi a pulakene kuJesus?
Oshike tatu ilongo koshiholelwa shaJesus?
2. Omuntu ota ka kala owala a hala okupulakena ketumwalaka lyetu, ngele oku wete kutya otu na ko nasha naye.
Holela Jesus
3. Ulukila omuntu olukeno. Itula moongaku dhaangoka to popi naye.
-
Ipula to ti: ‘Mbela oshike ti ipula nasho? Oshike tashi vulu oku mu kwathela notashi opalele onkalo ye?’ Okwiipula omapulo ngono otaku vulu oku ku kwathela wu ulukile ngoka to popi naye olukeno momukalo gu li paunshitwe noto shi ningi tashi zi komutima.
-
Ulika kutya owu na ko nasha naye mokupulakena kuye. Uuna omuntu e ku lombwele nkene e uvite nenge a popi uupyakadhi mboka e li muwo, ino lundulula oonkundathana.
4. Popya nolukeno nonesimaneko. Ngele owu uvitile omuntu uukwawo wanankali nowa hala shili oku mu kwathela, ote ke shi dhimbulula mewi lyoye. Popya iitya ya hogololwa nawa e to popi nomutono gwa eleka, ngoye henuka okupopya iinima mbyoka tayi vulu okuyemateka omuntu.
5. Kwathela omupulakeni. Tala nkene to vulu oku mu kwathela momikalo ndhoka tadhi opalele. Uuna tatu ulukile omuntu olukeno ota ka kala a hala okupopya natse.
TALA WO OMANYOLO TAGA LANDULA
Rom. 12:15, 16; Gal. 6:10; Heb. 13:16
