LALA BA WAMÖRÖGÖ FAHUHUOSA
FAMAHAʼÖ 3
Faʼasökhi Dödö
Goi-goi: ”Faʼomasi andrö . . . ba no si sökhi tödö.”—1 Ko. 13:4.
Hadia Nifalua Yesu?
1. Faigi VIDEO, mazui baso Yohane 9:1-7. Aefa daʼö, angeragö wanofu-nofu daʼa:
-
Hadia zi oföna sibai ifalua Yesu: ifadöhö ndra matua sauʼa mazui ifaʼema duria somuso dödö?—Faigi Yohane 9:35-38.
-
Moroi ba nifalua Yesu, hana wa adöni dödö niha andrö ba wamondrondrongo turia somuso dödö?
Hadia Wamahaʼönia Khöda?
2. Abölö adöni dödö niha ba duria nifaʼemada na taʼameʼegö tödö ira.
Oʼö Yesu
3. Töfaigö ba dödöu zalua ba niha böʼö. Khalaigö hadia nirasoinia.
-
Sofu khöu samösa: ’Hadia so gabula dödönia? Hadia wanolo si tefaudu khönia mazui sadöni dödönia?’ Fanofu-nofu daʼö dania zanolo yaʼugö ba wangoromaʼö faʼasökhi dödö hegöi ba wameʼe khönia fanolo na moguna.
-
Na öfondrondrongo huhuonia, no öforomaʼö wa öʼameʼegö tödö ia. Fagoʼösi huhuomö na itutunö khöu nösi dödönia mazui abula dödönia. Böi tutunö duho tanö böʼö.
4. Haogö wahuhuosa ba si fao sumange. Na sindruhu-ndruhu öʼameʼegö tödö ba ötolo ia, oroma daʼö moroi ba lagu wahuhuosamö. Fili ngawua wehede si sökhi ba böi ebuakö limö wahuhuosa enaʼö lö tetutu dödönia.
5. Beʼe wanolo. Alui ginötö si tefaudu ba wameʼe fanolo soguna khönia. Tola adöni dödönia ba wamondrondrongo nifaʼemada börö waʼasökhi dödö niforomaʼöda khönia.
