KUYAMBISHA MAKAMBILANO
MUTU 3
Kuwama ntima
Mfundo yofunika kuiganizila: “Chikondi . . . n’chiweme ntima.”—1 Akor. 13:4.
Vechichita Yesu
1. Lolelani VIDIYO, kapena ŵelengani Yohane 9:1-7. Ndipo ganizilani makonsho aŵa:
-
Kansi Yesu echita chinji poyamba—kumuchilisa kapena kukambilana naye uthenga uweme?—Onani Yohane 9:35-38.
-
Kansi ndaŵa yanji njila yechikatishila ntchito Yesu yechitisha munthu wamene uyu kumvwishila uthenga uweme?
Kansi tuphunzila chinji kuli Yesu?
2. Munthu angamvwishile uthenga wasu keno owona kuti tumudela nkhaŵa.
Konkhejani Yesu
3. Mukoŵamvwila chisoni ŵanthu. Mukoganizila mwakumvwila.
-
Likonsheni kuti: ‘Kansi n’chinji chumudesa nkhaŵa? Kansi n’chinji chakuwona kuti chingamuyavye komasoti kumusangalasa?’ Kuchita vamene ivi kungakuyavyeni kuti muwoneshe kuwama ntima na kuchita vinthu mwachilungamo.
-
Mungawoneshe kuti muganizila vosoŵa va munthu wamene uyo pomumvwishila akayamba kulaŵila. Keno wakuujani mwakuwonela vinthu kapena walaŵila vuto yakukumana nayo, osachinja nkhani yamene iyo. Woneshani kuti mumuganizila powona vakuwona yove kuti ni vofunika ngako pomumvwishila.
4. Mukolaŵila mowama ntima komasoti mwaulemu. Keno muŵamvwila chisoni ŵanthu noŵayavya, niye kuti angamvwishile uthenga wanu. Mukosamala na vamungalaŵile komasoti mwamungalaŵilile, ndipo osalaŵila vinthu vingaŵakhumudwise.
5. Mukonkhala oyavya. Mukofwana mipata yoyenelela kuti mukoŵayavya munjila iweme. Tikankhala aweme ntima munthu onkhala womasuka kulaŵila nase.
