OKUTANDIKA EKIGAANIIRO
EISHOMO 3
Embabazi
Omusingye: “Okukunda . . . [kwine] embabazi.”—1 Kor. 13:4.
Eki Yesu Yaakozire
1. Reeba VIDIYO, nari shoma Yohaana 9:1-7. Bwanyima oyetegyereze ebibuuzo ebirikukurataho:
-
Niki eki Yesu yaabandize kukora? N’okuhumuura omushaija nari okumubuurira amakuru marungi?—Reeba Yohaana 9:35-38.
-
Ahabw’enki eki kishemereire kuba kyareeteire omushaija kusiima amakuru marungi?
Nitwegyera ki Ahari Yesu?
2. Omuntu naabaasa kwikiriza obutumwa bwaitu, yaayetegyereza ngu nitumufaho.
Tooreza Yesu
3. Saasibwa omuntu. Teeraho kumanya oku arikwehurira.
-
Yebuuze oti: ‘Naabaasa kuba ayerarikiriire ahari ki? Niki ekirikubaasa kumushemeza kandi kikamuhwera?’ Eki nikiija kukuhwera kumugirira embabazi omu muringo oguhikire kandi ogwabuzima.
-
Yoreka ngu noofayo aha nshonga z’omuntu orikumuhurikiza. Yaakugambira oku arikwehurira aha nshonga, nari yaakugambira oburemeezi obu aine, otamwehuzya okagamba aha kindi.
4. Gamba omu muringo gw’embabazi kandi ogw’ekitiinisa. Waaba noosaasibwa omuntu kandi orikwenda kumuhwera, nikiija kweyorekyera omu migambire yaawe. Yegyendesereze ebigambo byawe n’eiraka eri orikukoresa, kandi yetantare kugamba ebirikubaasa kugwisa kubi omuntu.
5. Fayo kuhwera. Sherura oburyo bw’okuhwera omuntu omu miringo erikureebwa butunu. Ebikorwa by’embabazi nibibaasa kurugamu okugaaniira.
