BƆ ADAWUBƆLƐ BO
ƐZUKOALƐDEƐ 3
Atiakunlukɛnlɛma
Ngyinlazo: ‘Ɛlɔlɛ ati akunlu le kɛnlɛma.’—1 Kɔl. 13:4.
Mɔɔ Gyisɛse Yɛle La
1. Nea VIDIO ne, anzɛɛ kenga Dwɔn 9:1-7. Akee suzu kpuya ɛhye mɔ anwo:
-
Duzu a Gyisɛse limoale yɛle a—ɔyɛle anyezinliravolɛ ne ayile anzɛɛ ɔbɔle edwɛkpa ne nolo ɔhilele ye?—Nea Dwɔn 9:35-38.
-
Ɛnea mɔɔ Gyisɛse yɛle la a, duzu ati a bie a ɔmaanle nrenyia ne anye liele edwɛkpa ne anwo a?
Duzu A Yɛsukoa Yɛfi Gyisɛse Ɛkɛ A?
2. Saa awie nwu kɛ yɛdwenle ɔ nwo a, bie a ɔ nye balie kɛ ɔbadie yɛ edwɛkɛ ne.
Sukoa Gyisɛse
3. Te ahenle edwɛkɛ bo. Bɔ mɔdenle kɛ ɛbade kɛzi ɔte nganeɛ la abo.
-
Biza ɛ nwo kɛ: ‘Duzu a ɔbayɛ kɛ ɔlɛgyegye ye a? Duzu a bie a ɔbaboa ye anzɛɛ ɔ nye balie nwo a?’ Ɛyɛ zɔ a ɔbamaa wɔavi wɔ ahonle nu wɔala atiakunlukɛnlɛma ali.
-
Tie ahenle maa ɔnwu kɛ ɛdwenle debie mɔɔ hyia ye la anwo. Saa ɔka kɛzi ɔte nganeɛ wɔ debie bie anwo anzɛɛ ngyegyelɛ bie mɔɔ ɔlɛyia la anwo edwɛkɛ a, mmakakyi edwɛkɛ ne.
4. Tendɛ kɛnlɛma nee ɛbulɛ nu. Saa ɛse ahenle anwunvɔne na ɛkulo kɛ ɛboa ye amgba a, ɔbala ali wɔ wɔ ɛdendɛlɛ nu. Nea edwɛkɛ mɔɔ ɛbaha nee kɛzi ɛbaha ye la boɛ, na mmaka debie mɔɔ bagyegye ye la anwo edwɛkɛ.
5. Boa ye. Kpondɛ adenle kpalɛ dua zo boa ahenle kɛ mɔɔ ɔfɛta la. Saa yɛfi atiakunlukɛnlɛma nu yɛboa awie a, ɔ nee yɛ babɔ adawu.
