KYƐBƆ ƐNE EBIE KƆHYƐ YEBO KƆBƆ NGƆMMƆ Ɔ
ADESŨA 3
Yɛ Nikyee Bie Fa Boka Sona Ne
Bɔ Adesũa Ne Gyi So Ɔ: “Ɔdɔ . . . tianu yɛ mmerɛ.”—1 Kor. 13:4.
Bɔ Yesu Yɛle Ɔ
1. Nea VIDIO ne, anaa kenga Yohane 9:1-7. Eyie a, susu nzɛmmisa hemɔ nwo:
-
Nzu yeɛ Yesu limoa yɛle ɔ, ɔsale bĩaa ne anwonyerɛ, anaa ɔhãne nzɛmba ne hyirele ye?—Nea Yohane 9:35-38.
-
Nzuati yeɛ né bĩaa ne nye gye yenwo paa kyɛ okotie edwirɛ bɔ Yesu kã ne ɔ?
Bɔ Yesu Yɛle Ne, Nzu Yeɛ Yesũa Yefi Nu Ɔ?
2. Sɛ yɛne ebie bɔ ngɔmmɔ, na onwu kyɛ yɛ dwene yenwo a, ɔkɔmaa okotie edwirɛ bɔ yɛ kã ne.
Suesũa Bɔ Yesu Yɛle Ne
3. Má sona ne nwu kyɛ ɛdwene yenwo. Bɔ mmɔden kyɛ ekonwu bɔ ɔ́kɔso wɔ y’asetena nu ɔ.
-
Ɛkɔhora kobisa wɔnwo kyɛ: ‘Ɔhaw beni yeɛ sona ne fa nu ɔ? Nzu yeɛ meyɛ mema ye a, ɔkɔmaa yenye kɔgye paa ɔ?’ Sɛ enwu nikyee bɔ yenye gye yenwo, na ɛyɛ fa boka ye a, ɔkɔmaa okonwu kyɛ ɛdwene yenwo paa.
-
Sɛ sona ne kã ɔhaw bɔ ɔfa nu nanwo dwirɛ kyire wɔ a, ɛyɛ a nnébu wɔnye gua so. Sɛ ɛto wɔ boase tie ye a, okonwu kyɛ ɛdwene yenwo.
4. Nnɛkã edwirɛ biala bɔ ɔkɔha sona ne. Sɛ ɔte amba kyɛ ɛdwene sona nanwo, na ekuro paa kyɛ ɛboka ye a, kyɛbɔ edwudwo ne kɔmaa okonwu ye. Yeti, ɛyɛ a susu edwirɛ bɔ ɛkɔhã nanwo yé, na nea kyɛ ɛngɔhã edwirɛ biala bɔ ɔkɔha ye ɔ.
5. Yɛ nikyeebie fa boka sona ne. Sɛ ɛfa wɔnye to ase a, ekonwu nningyein biemɔ bɔ ɛkɔhora kɔyɛ kɔfa kɔboka ye ɔ. Sɛ ɛyɛ nikyeebie fa boka sona ne a, ɔkɔmaa ɛne ye kɔbɔ ngɔmmɔ.
