AMATAINA O SE TALANOAGA
LESONA 3
Agalelei
Mataupu silisili: “E agalelei le alofa.”—1 Kori. 13:4.
Mea na Faia e Iesu
1. Ia matamata le VITIŌ, pe faitau le Ioane 9:1-7, ona manatunatu lea i fesili nei:
-
a. O le ā na muamua faia e Iesu, o le faamālōlō o le tamāloa tauaso po o le faasoa atu o le tala lelei iā te ia? —Tagaʻi i le Ioane 9:35-38.
-
e. O le ā sou manatu, aiseā na naunau ai le tamāloa e faalogo iā Iesu?
O le ā e Tatou te Aʻoaʻoina Mai iā Iesu?
2. E faigofie i le tagata ona faalogo i le feʻau o le Tusi Paia pe a ia iloa mai lo tatou manatu mamafa iā te ia.
Faaaʻoaʻo iā Iesu
3. Ia taumafai e malamalama i faalogona o le tagata.
-
a. Ia fesili ifo: ʻO ā ni mea atonu o loo ia popole ai? O ā ni mea e ono fesoasoani iā te ia ma faaosofia ai lona naunau?’ O le faia faapea e fesoasoani iā te oe e faaalia ai le agalelei moni.
-
e. Ia faailoa atu e te manatu mamafa i mea e tāua i le tagata, e ala i lou faalogologo lelei. Pe a ia faailoa atu ona faalogona e faatatau i se mataupu pe taʻua foʻi sona faafitauli, aua e te suia le mataupu.
4. Ia talanoa i se auala agalelei ma faaaloalo. E iloa e le tagata lou tigā alofa ma lou naunau moni e fesoasoani iā te ia, i le auala e te talanoa atu ai. Ia filifili lelei au upu ma le leo e talanoa atu ai, ma ʻalofia le faia o ni tala faatigā.
5. Ia lotofesoasoani. Ia saʻili avanoa e fesoasoani ai i le tagata i ni auala aogā. O le faaalia o le agalelei e mafai ai ona maua le avanoa e amata ai se talanoaga.
