HA U QALA MOQOQO
THUTO EA 3
E-ba Mosa
Keletso ea Bibele: “Motho ea lerato o . . . mosa.”—1 Bakor. 13:4.
Jesu o Ile a Etsa’ng?
1. Shebella VIDEO kapa u bale Johanne 9:1-7 ebe u araba lipotso tse latelang:
-
Na ha Jesu a qala ho bua le monna eo o ile a bua le eena ka litaba tse hlahang ka Mangolong kapa o ile a qala pele ka ho mo folisa?—Sheba Johanne 9:35-38.
-
U nahana hore ke hobane’ng ha monna eo a ile a thabela ho mamela Jesu?
Re ka Ithuta’ng Mohlaleng oa Jesu?
2. Motho o tla thabela ho re mamela haeba a bona hore rea mo tsotella.
U ka Etsisa Jesu Joang?
3. Ipehe boemong ba motho eo u buang le eena. Leka ho utloisisa hore na o ikutloa joang.
-
Ipotse: ‘Motho eo o tšoenyehile ka eng? A ka thabela ha nka mo thusa ka eng? O thabela ho qoqa ka eng?’ Ho ipotsa lipotso tsena ho tla re thusa hore re bontše motho enoa mosa e le hore a ka hlokomela hore rea mo tsotella.
-
Bontša hore o amehile ka lintho tseo motho eo o buang le eena a tšoenyehileng ka tsona ka hore o mo mamele. Haeba a bua le uena ka bothata boo a nang le bona, u se ke oa bua ka ntho e ’ngoe.
4. Bua ka bonolo le ka tlhompho. Haeba u utloela motho eo u buang le eena bohloko u bile u batla ho mo thusa, o tla utloa ka tsela eo u buang ka eona hore u tšoenyehile ka eena. Nahana pele u bua ’me u bue ka tsela e bontšang hore oa mo hlompha. U se ke oa bua lintho tse ka mo khopisang.
5. Thusa batho. Thusa motho eo u qoqang le eena haeba u khona. Ho mo thusa ho ka ’na ha etsa hore a thabele ho qoqa le uena.
