KWAMBA KUYOWOYA NA ŴANTHU
SAMBIRO 3
Lusungu
Fundo: “Chitemwa . . . ntchalusungu.”—1 Kor. 13:4.
Ivyo Yesu Wakachita
1. Wonelerani VIDIYO, panji ŵazgani Yohane 9:1-7. Kufuma apo zgorani mafumbo ghakulondezgapo agha:
-
Kasi Yesu wakamba dankha kuchita vichi na munthu wachibulumutira, kumuchizga panji kumupharazgira makani ghawemi?—Wonani Yohane 9:35-38.
-
Mukughanaghana kuti chifukwa wuli chikaŵa chipusu kwa munthu uyu kutegherezga makani ghawemi?
Kasi Tikusambirako Vichi kwa Yesu?
2. Munthu wangategherezga uthenga withu para wawona kuti tikumughanaghanira.
Yezgani Yesu
3. Longorani munthu chiwuravi. Yezgani kughanaghanira umo wakujipulikira.
-
Jifumbani kuti: ‘Ni vichi ivyo wakwenera kuti wakufipa navyo mtima? Ni fundo wuli iyo yingamovwira na kumukondweska?’ Kuchita nthena kumovwiraninge kuti mumulongore lusungu lwanadi.
-
Mutegherezgani mwakuti mulongore kuti mukumughanaghanira munthu. Para munthu wamuphalirani umo wakujipulikira panji wayowoya suzgo linyake ilo wali nalo, lekani kusintha nkhani.
4. Yowoyani mwalusungu kweniso mwantchindi. Mazgu ghinu ghangalongora usange muli na chiwuravi na munthu ndipo mukukhumba nadi kumovwira. Musankhenge mwakupwelelera mazgu agho mungayowoya kweniso umo mungayowoyera ndipo lekani kuyowoya mazgu agho ghangakhuŵazga munthu.
5. Muwovwirani. Penjerezgani mipata ya umo mungawovwilira munthu. Para talongora lusungu munthu vingawovwira kuti wazomere kudumbiskana nase.
