WHEN YOU DE START DISCUSSION
LESSON 3
Dey Kind
Advice: “Love dey . . . kind.”—1 Cor. 13:4.
The Thing Wey Jesus Do
1. Watch the VIDEO, or read John 9:1-7. Then think about this questions:
-
Wetin Jesus first do—e first heal the blind man or e tell-am the good news?—Check John 9:35-38.
-
Why the style wey Jesus use, make the man dey ready more-more to listen to the good news?
Wetin We Learn From Jesus?
2. Person go fit dey ready to listen to our message if e feel say we care about-am.
Copy Jesus
3. Feel for the person. Try to think about how the person de feel.
-
Ask yourself say: ‘Wetin the person fit de worry about? Wetin fit help the person, and wetin e fit like?’ If you do this one, e go just help you dey kind and feel for the person from your heart.
-
When you de listen to person, you de show say you care about wetin dey important to the person. If e tell you how e de feel about something, or e talk about problem wey e de face, make you no change the topic.
4. Dey kind and show respect when you de talk. When you de pity for the person and really want help the person, this one go show for the way you de talk. Dey careful about wetin you de talk and how you de talk-am, and make you no talk things wey fit make the person vex.
5. Help the person. Look for ways wey good to help the person. When we de show say we dey kind to person, this one go make the person want talk with us.
