KUTANDA KUŴECHETANA NI MUNDU
LIJIGANYO 3
Ŵatendeleje Yambone
Lilemba: “Chinonyelo chili . . . chaumbone mtima.” —1 Akoli. 13:4.
Yaŵatesile Yesu
1. Alolele FIDIYO, kapena aŵalanje Yohane 9:1-7. Kaneko ajanje yiwusyo ayi:
-
Ana chindu chandanda chaŵatesile Yesu chaliji chapi, kumposya mundu jwangolola kapena kumlalichila ngani syambone? —Alole Yohane 9:35-38.
-
Akuganisya wuli, ligongo chichi munduju jwaliji jwakusachilila kupikanila ngani syambone syaŵalalichilaga Yesu?
Ana Yaŵatesile Yesu Yikutujiganya Chichi?
2. Mundu mpaka asache kupikanila utenga wetu naga akuyiwona kuti tukumganichisya.
Amsyasyeje Yesu
3. Ampikanichisyeje mundujo. Alinjeje kuganichisya mwakupikanila mumtima.
-
Aliwusyeje kuti: ‘Ana ni yindu yapi yayikumlagasya nganisyo? Ana ni ngani syapi syampaka asinonyele soni syampaka simkamuchisye?’ Kuganichisya yiwusyo yeleyi mpaka kwakamuchisye kuti atende yampaka akombole kuti amlosye mundujo umbone mtima.
-
Naga mundu akwasalila yakusawusya yakusimana nayo kapena mwakupikanila pangani jinejakwe, akachengaga nganijo nikutandisya jine. Ampikanileje pakusaka kulosya kuti yakuŵechetayo yikwakwaya.
4. Aŵecheteje mwakulosya kuti akumchimbichisya soni akumganichisya. Yindu yampaka aŵechete mpaka yilosye kuti akumtendela chanasa mundujo soni akusaka kumkamuchisya. Myoyo atendeje yindu mwakusamala mnope kuti akaŵecheta yindu yampaka yimkuŵasye.
5. Aŵeje ŵakoseka kumkamuchisya. Alinjeje kupata matala gambone gakuti amkamuchisye mundu jwakuŵechetana najojo. Naga tukumlosya mundu umbone mtima yili yangakayikasya kuti mpaka akunde kuŵechetana ni m’weji.
