YEME’E TATÉ MINLAÑ
AYÉ’É 4
Bo’o éjote nyul
Ñye’elan: “Ve a nje’ebane nlem ôse, kañesa’ané na bôte bevo’o ba dañe mia.”—Philip. 2:3.
Jame Paul a nga bo
1. Yene’e VIDÉO, nge ke na lañe’e Mame minlôman 26:2, 3. Mvuse ya valé fase’e minsili mi:
-
Aval avé Paul a nga liti na a ne éjote nyul éyoñ a nga laan a Njô bôt Agrippa?
-
Aval avé Paul a nga dutu ôsimesane be Yéhôva a Mintilan, sa ke be émien?—Fombô’ô Mame minlôman 26:22.
Éve’ela Paul ja ye’ele bia jé?
2. Foé bia kañete ja ye tu’a bo abeñe nge bia liti na bi ne éjote nyul a ésemé.
Bo’o ane Paul
3. Kobô’ô a ésemé ése. Te bo na môt a simesane na, wo yeme jôm ése a na, nye a nji yeme jôm éziñ.
4. Bo’o na môt a yeme na mame wo ye’ele ma so Kalate Zambe. Mejô me Zambe me bili asimesane da nambe bôte minlem. Éyoñe bia belane me, bia bo na mbunane bôt ô bi ngule mbôka’a.
5. Bo’o éjote nyul. Te jeñe na ô liti na wo wo kabe. Bi nji ke wôman a bôt. Wo ye liti na ô ne éjote nyule nge wo ba’ale évôvoé jôé. Yemek éyoñe wo yiane telé minlañ a kôlô vôm ate. (Mink. 17:14; Tite 3:2) Mbamba éyalane wôé a ne ve wo fane ya beta zu kañete nye melu ma zu.