KƐ́ OYAAJE SANEGBAA SHISHI
NIKASEMƆ 4
Ba Ohe Shi
Shishitoo mla: “Nyɛkɛ heshibaa abua mɛi krokomɛi akɛ amɛnɔ kwɔlɔ fe nyɛ.”—Fip. 2:3.
Nɔ Ni Paulo Fee
1. Kwɛmɔ VIDIO lɛ, loo kanemɔ Bɔfoi 26:2, 3. No sɛɛ lɛ, susumɔ sanebimɔi ni nyiɛ sɛɛ nɛɛ ahe:
-
Mɛɛ gbɛ nɔ bɔ ni Paulo kɛ Maŋtsɛ Agripa wie ehã lɛ tsɔɔ akɛ ebaa ehe shi?
-
Mɛni Paulo fee ni gbala maŋtsɛ lɛ jwɛŋmɔ kɛtee Yehowa kɛ Ŋmalɛ lɛ nɔ moŋ fe lɛ diɛŋtsɛ enɔ?—Kwɛmɔ Bɔfoi 26:22.
Mɛni Wɔkaseɔ Yɛ Nɔ Ni Paulo Fee Lɛ Mli?
2. Kɛ́ mɛi na yɛ wɔwiemɔ mli akɛ wɔbaa wɔhe shi ni wɔbuɔ amɛ lɛ, amɛbaabo wɔ toi.
Kasemɔ Paulo
3. Hã mɔ lɛ ana akɛ obuɔ lɛ. Kaafee onii tamɔ nɔ ni ole nɔ fɛɛ nɔ, ni mɔ lɛ leee nɔ ko nɔ ko. Hã ena yɛ owiemɔ mli akɛ obuɔ lɛ.
4. Hã mɔ lɛ ana faŋŋ akɛ nɔ ni otsɔɔ lɛ lɛ jɛ Biblia lɛ mli. Nyɔŋmɔ Wiemɔ lɛ baanyɛ ahã mɛi atsake bɔ ni amɛsusuɔ nii ahe amɛhãa kɛ bɔ ni amɛnuɔ he amɛhãa. Kɛ́ okɛtsu nii lɛ, no baaye abua amɛ ni amɛhe Yehowa kɛ e-Wiemɔ lɛ amɛye.
5. Hã mɔ lɛ ana akɛ ohe jɔ. Kaafee shɛii. Okɛ lɛ akataa saji anaa. Kɛ́ oto otsui shi, ni oshi kɛ́ nibii eyaaa lɛ jogbaŋŋ lɛ, mɔ lɛ baana akɛ obaa ohe shi. (Abɛi 17:14; Tito 3:2) Kɛ́ okɛ mɔ lɛ wie kɛ naajɔlɛ lɛ, ekolɛ be kroko lɛ ebaabo sane lɛ toi.
