PANGIGAFU TU PAKIYUVOVUG
LEKSION 4
Kinapakalinno
Prinsipio: “Mappakalinno kamu lallagu, anna ipay nu nga kanayun ta nono nu tu mas mapia i karuan ira nga totolay anne nikamu.”—Fil. 2:3.
I Kingngua ni Pablo
1. Girawan i VIDEO, onu bibbigan i Kingngua 26:2, 3. Kabalin na, paguruvovugan i tumunug ira nga pakkiavu:
-
Kunnasi nga nipasingan ni Pablo i kinapakalinno ta pakibbida na kani Patul Agripa?
-
Kunnasi nga nidirekta ni Pablo i atension kani Jehova anna ta Katurakan imbes tu ta baggi na?—Innan i Kingngua 26:22.
Anni i Magigiammu Tam Kani Pablo?
2. Mas nga maginteres i totolay ta mensahe tam nu mapakalinno anna marespeto ittam.
Parigan si Pablo
3. Ari ka mappakatannang. Ariammu ipatageno ta tolay nga mas aru i ammum anne nisa. Marespeto ka nga makibbida nisa.
4. Manawag nakuan nga naggafu ta Biblia i kinakurug nga ituddum. Makatukkal ta futu na totolay i egga ira ta Biblia. Nu usattam yatun, moffunattam ira nga mapeggan tu pangurug base ta Biblia, ari nga base ta kinagi tam.
5. Mattalupaddian nga masippo. Ariammu nga ipilit i puntom. Manaki tam i makipporfia. Ipasingammu i kinapakalinno gukaban na pattalupaddian nga kalmadu anna mataktika nga manaw. (Prov. 17:14; Tito 3:2) Nu masippo ittam, awayya na nga ta tumunug, magginna ngana i tolay ta mensahe tam.
