EPANỌ A RE RO MU ẸME HỌ
UWUHRẸ AVỌ 4
Wo Omaurokpotọ
Oware nọ Ebaibol ọ ta: “Avọ omaurokpotọ wha rri amọfa inọ a rro vi owhai.”—Fil. 2:3.
Oware nọ Pọl O Ru
1. Rri IVIDIO na, hayo se Iruẹru Ikọ 26:2, 3. Kẹsena whọ vẹ kẹ iyo enọ nọ e rrọ obotọ na:
-
Ẹvẹ Pọl o ro dhesẹ nọ o wo omaurokpotọ evaọ okenọ ọ jẹ ta ẹme kẹ Agripa ovie na?
-
Oghẹrẹ vẹ Pọl o ro fiobọhọ kẹ ahwo roro kpahe Jihova gbe Ikereakere na, orọnikọ omobọ riẹ hẹ?—Rri Iruẹru 26:22.
Eme Ma Wuhrẹ Mi Pọl?
2. Ovuẹ mai o rẹ mai duobọte ahwo nọ ma tẹ be romakpotọ ta ẹme avọ adhẹẹ.
Rọ Aro Kele Pọl
3. Hae ta ẹme avọ adhẹẹ. Who ru re ohwo na o roro nọ ọ riẹ oware ovo ho ho inọ whẹ whọ riẹ eware kpobi.
4. Ru ei vẹ kẹ ohwo na nọ Ebaibol na eware nọ who bi wuhrẹ iẹe na i no ze. Eme nọ e rrọ Ebaibol na i re duobọte ahwo udu. Ma tẹ be hae rehọ iẹe wuhrẹ ahwo, kiyọ ma bi fiobọhọ kẹ ae wo ẹrọwọ nọ o rẹ sai wọ ai mu Ọghẹnẹ họ ẹgọ.
5. Jọ ofu o mu owhẹ hẹ. Who du si ikẹ hẹ inọ ẹme ra na ọ rẹ rehọ. Ma gwọlọ lele ahwo vro avro ho. Whọ ta ẹme avọ ofu hu, re whọ rọ ere dhesẹ nọ who wo omaurokpotọ, whọ vẹ jẹ riẹ okenọ u fo nọ whọ rẹ rọ nyasiọ ohwo na ba. (Itẹ 17:14; Tait. 3:2) Whọ tẹ rọ unu uwowolẹ kpahe ẹme kẹ ohwo na, o sai ru nọ o re ro lele omai ta ẹme ziezi evaọ oke ofa.
