KWAMBĨĨSYA ŨNEENANYʼA
ĨSOMO YA 4
Ĩthĩwa na Wĩnyivyo
Mwolooto: “Ĩthĩwai na wĩnyivyo, mũyona ala angĩ me ma vata kwĩ inywʼĩ.”—Avi. 2:3.
Kĩla Vaulo Weekie
1. Ĩloele VITIO, kana ũsome Meko ma Atũmwa 26:2, 3. Ĩtina wa ũu, sũanĩa makũlyo aa maatĩĩe:
-
Vaulo oonanisye ata kana nĩwĩnyivĩtye yĩla waneenaa na Mũsumbĩ Akiliva?
-
Vaulo atetheeisye andũ ata mamũsũanĩe Yeova vamwe na Maandĩko vandũ va kũmũsũanĩa we mwene?—Sisya Meko ma Atũmwa 26:22.
Ngelekanyʼo ya Vaulo Yĩtũmanyĩsya Kyaũ?
2. Andũ no mendeewʼe mũno nĩ ũvoo witũ twamaneenyʼa twĩnyivĩtye na twĩ na ndaĩa.
Atĩĩa Ngelekanyʼo ya Vaulo
3. Neena wĩ na ndaĩa. Ndũkatume mũndũ ũla ũũtavya ũvoo mũseo ona ta vate kĩndũ wĩsĩ. Neena nake ũte na kĩvũthya.
4. Mũĩkĩĩthye kana ũvoo ũla ũũmũtavya umĩte Mbivilianĩ. Ndeto ya Ngai yĩthĩawa na ũvoo ũtonya kũkiita ngoo sya andũ. Twamĩtũmĩa twĩthĩawa tũyaka mũĩkĩĩo woo mũsinginĩ ũla waĩlĩte.
5. Ĩkala ũuĩtye. Ndũkatindĩe kũtetea mawoni maku. Tũyaĩlĩte kũkananĩa na andũ. Kwoou onanyʼa nĩwĩnyivĩtye kwa kwĩkala ũuĩtye na ũimanya nĩ ĩndĩĩ waĩlĩte kuma vau. (Nth. 17:14; Tito 3:2) Yĩla waneena ũuĩtye, kĩu no kĩtume mũndũ ũsu esa kwĩthukĩĩsya ĩvinda yĩngĩ.
