KUKALISA PUISANO
TUTO 4
Buikokobezo
Sikuka: “Ka kuba ni buikokobezo muunge babañwi kuli bamifita.”—Mafil. 2:3.
Zanaaezize Paulusi
1. Mubuhe VIDIO, kamba mubale Likezo 26:2, 3. Hasamulaho, munyakisise lipuzo zelatelela:
-
Paulusi naabonisize cwañi buikokobezo ka mwanaaambolezi ni Mulena Agripa?
-
Paulusi naakutalize cwañi ka nzila yenetahisize kuli batu baise mamelelo ku Jehova ni kwa Mañolo isiñi ku yena?—Mubone Likezo 26:22.
Luitutañi ku Paulusi?
2. Haiba lubonisa buikokobezo mi luambola ka likute, batu boluambola ni bona bakatabela kuteeleza ku luna.
Mulikanyise Paulusi
3. Musike mwaikutwisisa. Musike mwabonisa inge kuli muziba lika kaufela mi mutu yemuambola ni yena hakuna saziba. Muambole ni yena ka likute.
4. Mubonise kuli litaba zemubulela lizwa luli mwa Bibele. Litaba zeñozwi mwa Linzwi la Mulimu zakona kufita batu kwa lipilu. Haiba luitusisa lona halukutaza, lukatusa batu kuba ni tumelo yetiile.
5. Muzwelepili kuba bababunolo. Musike mwatundamena kutaluseza mutu yemuambola ni yena kuli litaba zemubulela ki za niti. Halutokwi kukanana ni mutu. Mubonise buikokobezo ka kusahalifa ni kuziba nako ya kuikema fateñi. (Liprov. 17:14; Tite 3:2) Haiba lualaba ka kuwa pilu, mwendi ukatabela kuteeleza nako yeñwi.
