IVYAKUTALIKA UKULANZYANYA NA WANTU
ISAMBILILO 4
Muwayicefya
Icisinka cisundo: ‘Muwayicefya, muwakuzya awawuyo ukulusye mwe weneco.’—Flpi. 2:3.
Vino Paulo Wacisile
1. Tambani e VIDYO, nanti wazyani Imilimo 26:2, 3. Apano mwasuke amawuzyo yano yakonkapo:
-
Uzye e Paulo walanjizizye wuli ukuyicefya pano walandanga ni Mfumu Agripa?
-
Uzye e Paulo walanjizizye wuli ukuti wasintilizile pe Yehova na pa Mawaliko ukucila pa lwakwe?—Lolani Imilimo 26:22.
Avyani Vino Tukusambililako kwe Paulo?
2. Tukafika awantu pa mwezo nga cakuti tuyicefizye pa kulanda swinya tuli nu mucinzi.
Mwakolanya Paulo
3. Mwawa nu mucinzi pano mukulanda. Mutaleka awantu walola ngati amwe wano mwamanya vyonsinye nu kuti weni pasi vino wamanya.
4. Muwasinincizya ukuti vino mukulanda vikufuma mwe Baibolo. Mwi Zwi lya kwe Leza mwawa amazwi yano yakafika awantu pa mwezo. Nga tukuliwomvya, tungalenga walisuwile.
5. Muwatekanya. Mutapaticizya awantu ukuti wazumile vino mukuwanena. Amuno tusilonda ukupanzinkana. Mwalanjizya ukuyicefya ukupitila mu kutekanya nu kumanya impindi yino muzipizile ukufumilapo. (Imilu. 17:14; Tait. 3:2) Nga cakuti mutekinye ncepamwi weyo umuntu angiza atemwe ukwivwa umuku wunji.
