KIXÁʼA NATÚʼUN XÍʼIN NA̱ YIVÍ
LECCIÓN 4
Vita koo iniún
Ña̱ káʼa̱n tu̱ʼun Ndióxi̱: “Vitá koo inindó, ta ndakanixi̱níndó ña̱ ndáyáʼvika inkana nu̱úndó” (Filip. 2:3).
Ña̱ ke̱ʼé ta̱ Pablo
1. Koto VIDEO á kaʼvi Hechos 26:2, 3. Tándi̱ʼi, ndakanixi̱ní xa̱ʼa̱ pregunta ña̱ va̱xi yóʼo:
-
¿Ndáa ki̱ʼva ni̱na̱ʼa̱ ta̱ Pablo ña̱ vitá ni̱xi̱yo inira tá ni̱ka̱ʼa̱nra xíʼin ta̱ rey Agripa?
-
¿Ndáaña ke̱ʼé ta̱ Pablo ña̱ nda̱sakáʼnura Jehová ta saátu ña̱ xi̱niñúʼura tu̱ʼunra ña̱ na̱túʼunra xíʼin na̱ yiví, nu̱úka ña̱ ka̱ʼa̱nra xa̱ʼa̱ ña̱ ndákanixi̱ní miíra? (Koto Hechos 26:22).
¿Ndáaña sákuaʼayó xíʼin ña̱ ke̱ʼé ta̱ Pablo?
2. Tá vitá íyo iniyó ta xíʼin ña̱ to̱ʼó káʼa̱nyó xíʼin na̱ yiví saá kúú ña̱ va̱ʼaníka kuniso̱ʼona tá nátúʼunyó xíʼinna xa̱ʼa̱ Ndióxi̱.
Keʼé táki̱ʼva ke̱ʼé ta̱ Pablo
3. Va̱ása ni̱nu koo iniún. Kǒo na̱ʼún xíʼin ña̱ kéʼún ña̱ xíni̱kaún nu̱ú na̱ yiví na̱ nátúʼún xíʼin. Ndiʼi tiempo to̱ʼó ka̱ʼún xíʼinna.
4. Na̱ʼa̱ ña̱ nu̱ú tu̱ʼun Ndióxi̱ ta̱váún ña̱ káʼún xíʼinna. Tu̱ʼun Ndióxi̱ va̱ʼaní chíndeétáʼanña xíʼin na̱ yiví ña̱ nasamana ki̱ʼva ña̱ íyona. Tá xíniñúʼún Biblia ña̱ natúʼún xíʼinna saá kúú ña̱ va̱ʼaní sakúaʼana xa̱ʼa̱ Ndióxi̱.
5. To̱ʼó ka̱ʼún xíʼinna. Va̱ása na̱ʼún ña̱ nina ña̱ káʼa̱n miíún kúú ña̱ nda̱a̱, saáchi va̱ása kúni̱yó kanitáʼanyó xíʼinna. Kǒo sa̱ún tá káʼa̱n ndi̱va̱ʼana xíʼún, tá xítoún ña̱ ndeéní sáa̱na va̱ʼaka kúáʼan (Prov. 17:14; Tito 3:2). Tá to̱ʼó ndákuiún yuʼú na̱ yiví, sana kuni̱na kuniso̱ʼona yóʼó tá ná ka̱ʼún xíʼinna inka yichi̱.
