GO THOMA POLEDIŠANO
THUTO 4
Ikokobetše
Molao wa motheo: “Ka boikokobetšo le tšee gore ba bangwe ba le feta ka bogolo.”—Bafil. 2:3
Seo Paulo a se Dirilego
1. Bogela BIDIO goba o bale Ditiro 26:2, 3, ke moka o leke go hwetša dikarabo tša dipotšišo tše di latelago:
-
Paulo o ile a bontšha bjang gore o ikokobeditše ge a be a bolela le Kgoši Agaripa?
-
Paulo o ile a bontšha bjang gore dilo tšeo a bego a di bolela ga di tšwe go yena eupša di tšwa go Jehofa le ka Mangwalong?—Bona Ditiro 26:22.
Seo re Ithutago Sona go Paulo
2. Batho ba ka theetša molaetša wa rena ge e ba re bolela le bona ka tlhompho e bile re ikokobeditše.
Ekiša Paulo
3. Bolela le batho ka tlhompho. O se ke wa itira eka o tseba dilo ka moka le go dira gore go bonagale eka batho bao o boledišanago le bona ga ba tsebe selo.
4. Bontšha gore dilo tšeo o di rutago di tšwa ka Beibeleng. Beibele e kgona go kgoma dipelo tša batho. Ge re e diriša, re ba thuša gore ba dumele gore seo re ba rutago sona se tšwa ka Lentšung la Modimo.
5. Eba boleta. O se ke wa gapeletša batho go dumela seo o se bolelago. Ga re nyake go ngangišana le batho. Bontšha gore o ikokobeditše ka go dula o išitše maswafo fase gomme o tsebe nako ya maleba ya go laela motho yoo o boledišanago le yena. (Die. 17:14; Tito 3:2) Ge o ka araba motho yoo o bolelago le yena ka boleta, mohlomongwe nakong e tlago a ka theetša ge yo mongwe wa rena a boledišana le yena.
