CHAMAJIJ TZIJONEM
KʼUTUNEM 4
Machʼachʼem ibʼ
Pixabʼ re ri Biblia: «Chimachʼarisaj iwibʼ chichʼobʼoʼ chi ri nikʼaj chik e areʼ nimaʼq na kiqʼij chiwach ix» (Filip. 2:3).
Ri xubʼan ri Pablo
1. Chawilaʼ ri VIDEO o chasikʼij uwach Hechos 26:2, 3. Tekʼuriʼ chawilaʼ ri preguntas riʼ:
-
¿Jas xubʼan ri Pablo che ukʼutik che nim xril wi ri qʼatal tzij Agripa rukʼ ri tzij che xukojo?
-
¿Jas xubʼan ri Pablo rech are nim kil ri Jehová y ri Utzij chuwach ri areʼ? (Chawilaʼ Hechos 26:22).
¿Jas kqetaʼmaj chrij ri Pablo?
2. Ri e winaq kkitatabʼej ri kqabʼij chke we kqabʼan ta nim che qibʼ y kqakʼutu che nim keqil wi.
Chabʼanaʼ awe ri xubʼan ri Pablo
3. Kabʼan ta che awibʼ che awetaʼm ronojel. Kakʼut ta rukʼ ri atzij che kʼo más awetaʼmabʼal chuwach ri winaq. Xaneʼ chakʼutuʼ che nim kawil wiʼ.
4. Chaqʼalajisaj che pa ri Biblia awesam wi ri kabʼij. Ri Utzij ri Dios kkunik qas kopan pa kanimaʼ ri e winaq. Are chiʼ kqakojo, tajin keqatoʼ rech kkʼojiʼ jun koʼalaj kikojonik.
5. Chakojoʼ utz taq tzij. Kakoj ta chuqʼabʼ che ubʼixik che qastzij ri tajin kabʼij. Kqaj taj kojchʼojin rukʼ ri winaq. Ri machʼachʼem ibʼ kojutoʼ rech kpe ta qoyowal y che kqetaʼmaj jampaʼ rajawaxik kojbʼek (Prov. 17:14; Tito 3:2). We at rukʼ utz taq tzij kattzijon rukʼ ri winaq weneʼ pa jun chi qʼij kraj ktzijon chi qukʼ.
