HASAAWA HANAFA
ROSO 4
Umo Heeshshi Assa
Xintu seera: “Wolu manni kiˈnenni roorinohu gede assitine hedde.”—Fil. 2:3.
Phaawuloosi Assinore
1. VIIDIYO laˈe; woy Soqqamaasinete Looso 26:2, 3 nabbabbe. Hakkiinni, aante noo xaˈmuwa hiince:
-
Phaawuloosi Moote Agiripha hasaawisino gari umosi heeshshi assannoha ikkinota leellishannohu hiittoonniiti?
-
Phaawuloosi mannu iso jajanno gede ikkikkinni Yihowanna Qullaawa Borro illachishanno gede assinohu hiittoonniiti?—Soqqamaasinete Looso 26:22 lai.
Phaawuloosi Assinorinni Maa Ronseemmo?
2. Umonke heeshshi assine ayirrinyunni coyiˈneemmoha ikkiro, dudumbeemmo sokka roore baxissannota ikkitanno.
Phaawuloosi Faale Hadhe
3. Naadantinoonte. Baalankare affinoonnihu gede woy hakku manchi mittoreno afinokkihu gede assitine coyidhinoonte. Hatteentenni ayirrinyunni hasaawissesi.
4. Dudubbinanni halaali buicho Qullaawa Maxaafa ikkinoti xabbe leelto. Maganu Qaali giddo mannu wodanira coˈanno hedo no. Maganu Qaale seekkine horoonsiˈneemmoha ikkiro, macciishshanno manni ammana dancha safo aana xintantinota ikkitanno gede kaaˈlinanni heeˈnoommo.
5. Joongillunni coyidhe. Yitinoonniri adda ikkinota ammansiisate coye cuˈmidhine gibbinoonte. Mannu ledo nyerri yaa dihasiˈneemmo. Gaˈlabbi yaankenna hasiisanno woyite agurre haˈranke umonke heeshshi assineemmota leellishshanno. (Law. 17:14; Tit. 3:2) Joongillunni qoltiniro, manchu wole woyite sokkanke macciishshe adhara dandaanno.
