OPATXERIHA OTTHEKULA
YOOSOMA 4
Wiiyeviha
Miruku sa mBiblyani: “Mowiyevihani, mwàttittimiheke asikhw’inyu wipwaha asinen’anyu.” — Afil. 2:3.
Etthu Paulo aapankaawe
1. Moone EVIIDIYU, naari musome Miteko 26:2, 3. Avinyaka mwaakhule makoho enttharelana:
-
Vaavo uulumaawe ni Mwene Agripa, Paulo oonihenre moota heeni wiiyeviha?
-
Paulo oonihenre moota heeni weera anvaha ovuwa Yehova ni soolepa ohiya mwaneene awe? — Munwehe Miteko 26:22.
Ntakihero na Paulo ninnixuttiha eheeni?
2. Atthu eneereke otthuna wiiwa mitthenka ninlaleyaahu, wakhala weera ninlaleya moowiiyeviha ni mwa nttittimiho.
Mutthareke ntakihero na Paulo
3. Mukhaleke oowiiyeviha vaavo munlaleeraanyu. Muheerereke woonihera weera moosuwela itthu sintxipale ni weera mutthu mummuleelaanyu khasuwenle etthu. Muulumeke mwa nttittimiho ni atthu.
4. Nwoonihereke atthu weera ele munxuttihaanyu enkhuma mBiblyani. Masu a Muluku, sookhalamo miruku sikhanle soowaavara murima atthu, nanvarelaka muteko Biblya, ninnaakhavihera atthu okhalano nroromelo moorweela mwa Biblya.
5. Mukhaleke oomaaleleya. Muhinyakulihaneke ni atthu mweereraka woonihera weera munhima ekhaikhai, mwaha wooweera hiyo khanintthuna onyakulihana, mukhale oowiiyeviha, oomaala musuweleke ewoora yoovinyavo. (Mir. 17:14; Tito 3:2) Wakhala weera nyuwo munimuuluma mooreera murima, pooti oweeriha atthu awo otthuna wuuluma ni nyuwo etempu ekina.
