BƆ NƐ O MAA JE NÍ SƐƐMI SISI HA
NÍ KASEMI 5
O Hɛ Nɛ Kã Si
Sisi Tomi Mlaa: “Be fɛɛ be ɔ, nyɛ ha nɛ nyɛ munyuhi nɛ ngɔ.”—Kol. 4:6.
Nɔ́ Nɛ Paulo Pee
1. Moo hyɛ VIDEO ɔ, aloo moo kane Ní Tsumi 17:22, 23. Lɔ ɔ se ɔ, mo susu sane bimihi nɛ nyɛɛ se ɔmɛ a he:
-
Benɛ Paulo na lakpa jami mi ní peepee nɛ ngɛ nɔ yae ngɛ Atene ɔ, kɛ e nu he ha kɛɛ?—Hyɛ Ní Tsumi 17:16.
-
Paulo kã we a hɛ mi, mohu ɔ, mɛni blɔ nɔ e gu kɛ da a hemi kɛ yemi ɔ nɔ kɛ fiɛɛ sane kpakpa a ha mɛ?
Mɛni Wa Kaseɔ Ngɛ Paulo Nɔ Hyɛmi Nɔ́ Nɛ ɔ Mi?
2. Ke wa susu nɔ́ nɛ wa ma de kɛ bɔ nɛ wa ma de lɛ ha kɛ be nɛ e sa kaa wa kɛ de ɔ he saminya a, lɔ ɔ ma ha nɛ nihi a bua maa jɔ kaa a maa bu wa sɛ gbi ɔ tue.
Moo Kase Paulo
3. Moo tu munyuhi nɛ ma ha nɛ ni ɔmɛ a bua nɛ jɔ. Kaa nɔ hyɛmi nɔ́ ɔ, ke o kɛ nɔ ko nɛ je weku nɛ a ja we Mawu ngɛ mi ɔ ngɛ munyu tue ɔ, moo hyɛ bɔ nɛ o kɛ Baiblo ɔ loo Yesu biɛ ma tsu ní ha saminya.
4. O kɛ oya yemi ko dla nɔ ɔ juɛmi. Ngmɛɛ lɛ blɔ nɛ e je e susumi kpo faa. Ke e de nɔ́ ko nɛ e teɔ si kɛ siɔ Baiblo tsɔɔmi ɔ, o kɛ lɛ ko sã nya. (Yak. 1:19) Ke o bu lɛ tue saminya a, o ma ba le nɔ́ he je nɛ e he jamɛ a nɔ́ ɔ ye ɔ.—Abɛ 20:5
5. Ke e maa hi ɔ, o kɛ lɛ nɛ kpa gbi ngɛ ní komɛ a he nɛ o je e yi. Eko ɔ, e he ye kaa níhi nɛ a peeɔ ngɛ e jami ɔ mi ɔ ji anɔkuale. Ke e ba lɛ jã a, bɔɔ mɔde kaa o kɛ lɛ maa tu níhi nɛ o kɛ lɛ kpa gbi ngɛ he ɔ a he munyu. Kɛkɛ ɔ, bɔɔbɔɔbɔɔ ɔ, ye bua lɛ nɛ e ba nu níhi nɛ Baiblo ɔ tsɔɔ ɔmɛ a sisi.
