CHIZE MUHASA KUPUTUKA LUSANGO
LONGESO 5
Hanjika ni Mana
Shimbi: “Maliji jenu akapwe apema mashimbu eswe.”—Kolo. 4:6.
Yika Paulu Alingile?
1. Tala CHINEMA, hanji kutanga Yilinga 17:22, 23. Mba nushimutwine yihula yino:
-
Kuchi Paulu evwile hakutwala ku yitanga ya uwayilo wa mahuza yize amwene mu Atene?—Tala Yilinga 17:16.
-
Kuchi Paulu azachishile yuma yize A-Atene te akufuliela hanga aambulwile sango jipema ni vumbi chakuhona kwahisa?
Yika Mutuhasa Kulilongesa Hali Paulu?
2. Atu mazanga kutupanjika ni mbunge yeswe nyi twasakula kanawa yuma yize mutuhanjika, chize mutuyihanjika ni mashimbu waze mutuyihanjika.
Imbulula Paulu
3. Sakula kanawa maliji je. Chakutalilaho, nyi muhanjika ni mutu yoze hi mukwa-Kristu ko, muchifupiwa kwalumuna jila yize muhanjika nenyi hakutwala ku Mbimbiliya ni hakutwala kuli Yesu.
4. Kanda ulipupwisa kukumika mutu. Echa mutu hanga ahanjike chize anevu. Nyi iye mahanjika chimwe chuma chize muchilimika ni malongeso a mu Mbimbiliya, kanda umukumbulula chipi. (Tia. 1:19) Nyi mupanjika kanawa yize anambe, munyingika yuma yize akufuliela ni mumu liaka akuyifuliela.—Yishi. 20:5.
5. Nyi muchilita tayiza nyonga lienyi ni kumuchichimieka. Mutu mahasa kufuliela ngwenyi, yuma yize akulilongesa mu yingeleja yenyi yili yamwenemwene. Kashika, eseka kuhanjika ha chuma chize yenu eswe aali nwakutayiza, mba hakehe-hakehe mumukwasa kunyingika yuma yize Mbimbiliya yakulongesa.
TALA NAWA
Yishi. 25:15; 2 Timo. 2:23-26; 1 Petu. 3:15
