BARO DAMINƐTƆ NI MƆGƆW YE
KALANSEN 5
Kuma nɛmɛnɛmɛ
Sariyakolo: “Aw k’aw ka kuma fɔcogo ɲa tuma bɛɛ.”—Kɔlɔs. 4:6.
Ciden Pol y’a kɛ cogo min na
1. VIDEWO filɛ wala Kɛwaliw 17:22, 23 kalan. O kɔ, ɲiningali nunu jaabi:
-
Ciden Pol ye ngalon diinanw ka batoliko minw ye Atɛni dugu la, o ye mun lo kɛ a la?—Kɛwaliw 17:16 lajɛ.
-
Pol ma Atɛnikaw jalaki. Nka, a basigira u ka lannakow kan cogo di ka kibaro diiman fɔ u ye nɛmɛnɛmɛ?
An be kalan min sɔrɔ ciden Pol fɛ
2. An bena min fɔ, an bena o fɔ cogo min na ani wagati min na, n’an b’an janto o la koɲuman, mɔgɔw ka teli k’an lamɛn.
Ciden Pol ladegi
3. I bena min fɔ, o sugandi ka ɲɛ. Misali la, n’i lamɛnbaga tɛ kerecɛn ye, n’a sɔrɔ i ka ɲi k’i ka kumadenw sugandi ka ɲɛ n’i be kumana Bibulu wala Yezu koo la.
4. Kana teliya k’i lamɛnbaga ka kumaw latilen. A to a k’a ka miiriya bɛɛ fɔ. N’a ye kuma dɔ fɔ min bɛnnin tɛ ni Bibulu ka fɔta ye, kan’a sɔsɔ (Zaki 1:19). N’i y’a lamɛn koɲuman, i ben’a lɔn a lanin be min na ani fɛɛn min kama a lanin b’o la.—Talenw 20:5.
5. N’a tigi ka fɔta bɛnnin lo, sɔn o ma ani a tando o kosɔn. N’a sɔrɔ ale fɛ, ale ka lannakow lo ye tiɲɛn ye. Aw bɛnnin lo kelen ma min na, kuma o koo la. Ani dɔɔni dɔɔni, a dɛmɛ a ka Bibulu ka kalanw faamu.
