WEN WI TAAK TU PIIPL FI DI FOS TAIM
LESN 5
Taak Tu Dem Nais
Sitn We Yu Kyan Riizn Pan: “Taak tu piipl nais, an mek dem waahn fi iina wa unu a se.”—Kol. 4:6.
Wa Paal Did Du
1. Wach di VIDIYO, ar riid Aks 17:22, 23. Den ansa dem kwestiyan ya:
-
Ou Paal did fiil bout di sitn dem we di piipl dem did a du fi worship dem faalz gad dem iina Atenz?—Luk pan Aks 17:16.
-
Insted-a fi tel di piipl dem fram Atenz se wa dem a du rang, ou Paal did shuo se im did av rispek fi wa dem biliiv iina wen im did a tel dem bout di gud nyuuz?
Wa Wi Lorn Fram Wa Paal Did Du?
2. Bifuo wi staat taak tu piipl, ef wi tingk gud bout wa wi a-go se, ou wi a-go se it, an wen wi a-go se it, dem wi muo fi tek iin wa wi a se.
Du Laik Wa Paal Did Du
3. Tingk gud bout wa yu a-go se. Laik ef yu a taak tu sumadi we no iina di choch ting, yu mait-a afi chienj op ou yu tel dem bout di Baibl ar ou yu taak tu dem bout Jiizas.
4. No rosh fi tel dem se dem rang. Mek dem tel yu wa de pan dem main. Ef yu fain se dem se sitn we go gens wa di Baibl se, no bada rosh fi go tel dem wa mek dat rang. (Jmz. 1:19) Wen yu tek di taim fi lisn tu dem, yu wi get fi andastan wa dem biliiv iina an wa mek dem biliiv dat.—Pr. 20:5.
5. Ef it kyan apm, mek dem si se yu si chuu wa dem a se an big dem op wen dem gwaan gud. Di sumadi mait-a riili fiil se di sitn dem we dem biliiv a di rait ting. So chrai taak bout sitn we di tuu a unu biliiv di sed ting bout an den likl bai likl yu kyan elp dem fi andastan wa di Baibl se.
LUK PAN DEM YA TU
Pr. 25:15; 2 Tim. 2:23-26; 1 Pii. 3:15
